Prezıdent Qasym-Jomart Toqaev resmı saparmen Qyrǵyzstanǵa baryp, eki el arasyndaǵy strategıalyq áriptestik pen baýyrlastyq qatynastardy nyǵaıtý maqsatynda birneshe mańyzdy kezdesýler ótkizdi. Osy sapar barysynda Qazaqstan men Qyrǵyzstan arasyndaǵy ekonomıkalyq, mádenı-gýmanıtarlyq jáne ǵylymı yntymaqtastyq máseleleri talqylandy,- dep habarlaıdy Dalanews.kz
Qyrǵyzstan Joǵarǵy Keńesiniń depýtaty Abakırov Eldar Qazaqstan Prezıdentiniń saparyna qatysty óz pikirin bólisip, eki el arasyndaǵy dostyq pen birlesken bastamalarǵa baǵa berdi.
- Qazaqstan Prezıdenti Qasym-Jomart Toqaev eki el arasyndaǵy saýda kólemi shamamen 2 mıllıard dollarǵa jetkenin atap ótti. Sizdiń oıyńyzsha, bul kórsetkishti arttyrý jáne yntymaqtastyqty odan ári ózara tıimdi etý úshin qandaı sharalar qajet?
- Biz úshin burynǵy kórsetkish bir mıllıard dollar bolsa, qazir saýda kólemi eki mıllıardqa jetti, bul óte jaqsy nátıje dep oılaımyn. Osy kórsetkishti arttyrý úshin, meniń pikirimshe, bizdiń elderimiz Eýropa Odaǵynyń tájirıbesine súıene otyryp, shekarada barlyq baqylaý túrlerin alyp tastaý kerek. Bul eki eldiń ekonomıkasyn aıtarlyqtaı jaqsartady. Biz taýar aınalymyn jeńildetip, ony tez ári tıimdi etý úshin osy baǵytta qadam jasaýmyz kerek.
- Prezıdent QasymóJomart Toqaevtyń sapary barysynda ınfraqurylymdyq jobalar, onyń ishinde jol salý jáne tranzıttik dálizderdi damytý máseleleri talqylandy. Sizdiń oıyńyzsha, osy bastamalardyń qaısysy strategıalyq áriptestikti nyǵaıtýda basymdyqqa ıe?
- Qyrǵyzstan men Qazaqstan ǵana emes, búkil Ortalyq Azıa ózin tıimdi tranzıttik dáliz retinde kórsetýi tıis. Shyǵystan batysqa da, ońtústikten soltústikke de. Bul óńirge paıda ákeledi, júkter bizdiń elder arqyly ótedi, teńiz joldaryna qaraǵanda tıimdi bolady. Muny júzege asyrý úshin júkter shekarada keshiktirilmeı, jyldam ótýi kerek, al ınfraqurylym - temirjoldar, avıasıa jáne avtomobıl joldary joǵary deńgeıde bolýy qajet. Sol kezde biz óńirdiń tranzıttik áleýetin tıimdi paıdalanyp, ekonomıkalyq paıda ala alamyz.
- Qazaqstan Prezıdenti Qyrǵyzstan Prezıdenti Sadyr Japarovty «Altyn Qyran» ordenimen marapattap, eki el arasyndaǵy yntymaqtastyqty nyǵaıtýǵa qosqan úlesin atap ótti. Sizdiń oıyńyzsha, bul marapat elder arasyndaǵy ekonomıkalyq jáne ınvestısıalyq jobalardy odan ári damytýǵa qalaı yqpal etedi?
- «Altyn Qyran» ordenimen marapattaý óte mańyzdy sımvol. Ortalyq Azıadaǵy barlyq elder barynsha jaqyndasýy kerek, al mundaı marapattar memleketter arasyndaǵy senim men turaqty baılanystardy nyǵaıtady. Ekonomıkalyq turǵydan da bul ásirese mańyzdy: bir-birimizge ınvestısıa jasaý basqa elderge qaraǵanda áldeqaıda tıimdi. Mundaı qadamdar senim kópirin qalyptastyryp, iri jobalardy júzege asyrýǵa jáne ózara ınvestısıany arttyrýǵa múmkindik beredi, bul eki jaqqa da paıda ákeledi.
- Ekonomıka jáne ınfraqurylym salasynda qandaı uzaq merzimdi birlesken jobalar Qyrǵyzstan men Qazaqstannyń óńirdegi pozısıasyn nyǵaıtyp, halyqaralyq bedelin arttyra alady?
- Eki eldiń de óziniń myqty jaqtary bar, olardy kúsheıtý qajet. Mysaly, Qyrǵyzstan taýly baǵyttar boıynsha tıimdi ornalasqan, týrısik áleýetke ıe jáne energetıka, aýyzsý jáne sýarmalyq maqsatta baı gıdroresýrstarǵa ıe. Qazaqstan da Qyrǵyzstanda joq biregeı artyqshylyqtarǵa ıe. Biz osy myqty jaqtardy kúsheıtetin birlesken jobalardy júzege asyrýymyz kerek, kanaldar men sý qoımalaryn salý, energetıkany jáne týrızmdi damytý sıaqty. Nátıjesinde, mundaı bastamalar eki elge de aıtarlyqtaı paıda ákelip, óńirdegi ekonomıkalyq pozısıany nyǵaıtady jáne Qyrǵyzstan men Qazaqstannyń halyqaralyq bedelin arttyrady.
