Qyrǵyzdarǵa qoiǵan 5 shart (video)
Búgin Tashkentte ótken TMD elderi úkimet basshylarynyń otyrysynda Qyrǵyzstan premer-ministri Sapar Isakov otyrystyń kún tártibine enbegen qazaq-qyrǵyz shekarasyndaǵy jaǵdaiǵa qatysty máseleni kóterdi.
Ol Qazaqstan shekarada jasandy kedergiler jasap otyrǵanyn málimdedi.
“Qazaqstan úkimeti qyrǵyz tarapynyń málimdemesin orynsyz dep esepteidi. Elimizdiń bul máselege qatysty ustanymy bárine jaqsy málim. Ol Eýraziialyq ekonomikalyq odaq elderiniń ortaq ekonomikalyq keńistigin qurý ideologiiasyna tolyǵymen sáikes keledi jáne Odaqtyń qatysýshy elderiniń ekonomikalyq shyǵyny men qaýip-qaterlerin meilinshe tómendetýge baǵytalǵan», — dedi Saǵyntaev otyrysta.
Onyń aitýynsha, Qazaqstan úkimeti bes baǵyt boiynsha qyrǵyz tarapynyń syndarly ustanymyna úmit artady.
Birinshi. Salyqtyq ákimshiliktendirý boiynsha Qyrǵyzstan ulttyq zańnamasynyń normalaryn EAEO quqyǵymen sáikestendirýi kerek.
Ekinshi. Zańsyz eksportqa, sonyń ishinde kontrafaktilik ónimderge qarsy is-qimyl.
Úshinshi. EAEO talaptaryn saqtaý úshin qyrǵyz tarapy taýarlardyń veterinarlyq-sanitarlyq, fitosanitarlyq (karantindik) baqylaýyn turaqty qamtamasyz etýi tiis.
Tórtinshi. Qyrǵyzstan Odaqqa múshe elderdiń kólik zańnamasyn buzýdyń aldyn alý jáne jolyn kesý boiynsha sharalar qabyldaýy kerek.
Besinshi. Kontrabanda men qazaq-qyrǵyz shekarasynda esirtki, qarý-jaraq, oq-dáriniń zańsyz tasymaldanýyna jol bermeý.
“Osylaisha, biz tek ózimizdiń ulttyq múddemizdi ǵana qorǵamaimyz. Biz EAEO keńistiginiń ekonomikalyq qaýipsizdigi men ekonomikalyq múddelerin qorǵaimyz. Qazaq-qyrǵyz shekarasynda EAEO zańnamasynyń normalary men talaptaryna tolyq sáikes keletin monitoring jáne baqylaý tártibi saqtalady», — dedi Saǵyntaev.
Ol Qazaqstan tarapy ekijaqty ekonomikalyq yntymaqtastyq pen shekaralyq, kóliktik, fitosanitarlyq jáne veterinarlyq baqylaý, kedendik jáne salyqtyq ákimshiliktendirýdegi ózara árekettestik máseleleri boiynsha syndarly dialogqa daiyn ekenin atap ótti.
“Biz aldaǵy ýaqytta da qyrǵyzstandyq áriptesterge EAEO quqyǵy men normalaryna beiimdelýge kómek kórsetýge ázirmiz”, — dep túiindedi Saǵyntaev.
Qazaq-qyrǵyz shekarasyndaǵy problemalar 10 qazanda bastaldy. Qazaqstan biliginiń málimdemesi boiynsha, munyń bári «sur» importqa qarsy kúresten keiin týyndaǵan. 18 qazanda Sapar Isakov Astanaǵa jumys saparymen kelgen edi. Sapar barysynda qyrǵyz premeri tekseris kezinde jeke júgi bar azamattar, jolaýshylary bar reistik avtobýstar, jeńil kólikter men bos júk kólikterine basymdyq berý týraly ýaǵdalasty. Osydan keiin avtokólikter shekaradan jyldam ótkizile bastady.
https://www.youtube.com/watch?v=j2J-cn9qETI
