بۇگىن تاشكەنتتە وتكەن تمد ەلدەرى ۇكىمەت باسشىلارىنىڭ وتىرىسىندا قىرعىزستان پرەمەر-مينيسترى ساپار يساكوۆ وتىرىستىڭ كۇن تارتىبىنە ەنبەگەن قازاق-قىرعىز شەكاراسىنداعى جاعدايعا قاتىستى ماسەلەنى كوتەردى.
ول قازاقستان شەكارادا جاساندى كەدەرگىلەر جاساپ وتىرعانىن مالىمدەدى.
“قازاقستان ۇكىمەتى قىرعىز تاراپىنىڭ مالىمدەمەسىن ورىنسىز دەپ ەسەپتەيدى. ەلىمىزدىڭ بۇل ماسەلەگە قاتىستى ۇستانىمى بارىنە جاقسى ءمالىم. ول ەۋرازيالىق ەكونوميكالىق وداق ەلدەرىنىڭ ورتاق ەكونوميكالىق كەڭىستىگىن قۇرۋ يدەولوگياسىنا تولىعىمەن سايكەس كەلەدى جانە وداقتىڭ قاتىسۋشى ەلدەرىنىڭ ەكونوميكالىق شىعىنى مەن قاۋىپ-قاتەرلەرىن مەيلىنشە تومەندەتۋگە باعىتالعان»، — دەدى ساعىنتايەۆ وتىرىستا.
ونىڭ ايتۋىنشا، قازاقستان ۇكىمەتى بەس باعىت بويىنشا قىرعىز تاراپىنىڭ سىندارلى ۇستانىمىنا ءۇمىت ارتادى.
ءبىرىنشى. سالىقتىق اكىمشىلىكتەندىرۋ بويىنشا قىرعىزستان ۇلتتىق زاڭناماسىنىڭ نورمالارىن ەاەو قۇقىعىمەن سايكەستەندىرۋى كەرەك.
ەكىنشى. زاڭسىز ەكسپورتقا، سونىڭ ىشىندە كونترافاكتىلىك ونىمدەرگە قارسى ءىس-قيمىل.
ءۇشىنشى. ەاەو تالاپتارىن ساقتاۋ ءۇشىن قىرعىز تاراپى تاۋارلاردىڭ ۆەتەرينارلىق-سانيتارلىق، فيتوسانيتارلىق (كارانتيندىك) باقىلاۋىن تۇراقتى قامتاماسىز ەتۋى ءتيىس.
ءتورتىنشى. قىرعىزستان وداققا مۇشە ەلدەردىڭ كولىك زاڭناماسىن بۇزۋدىڭ الدىن الۋ جانە جولىن كەسۋ بويىنشا شارالار قابىلداۋى كەرەك.
بەسىنشى. كونتراباندا مەن قازاق-قىرعىز شەكاراسىندا ەسىرتكى، قارۋ-جاراق، ءوق-دارىنىڭ زاڭسىز تاسىمالدانۋىنا جول بەرمەۋ.
“وسىلايشا، ءبىز تەك ءوزىمىزدىڭ ۇلتتىق مۇددەمىزدى عانا قورعامايمىز. ءبىز ەاەو كەڭىستىگىنىڭ ەكونوميكالىق قاۋىپسىزدىگى مەن ەكونوميكالىق مۇددەلەرىن قورعايمىز. قازاق-قىرعىز شەكاراسىندا ەاەو زاڭناماسىنىڭ نورمالارى مەن تالاپتارىنا تولىق سايكەس كەلەتىن مونيتورينگ جانە باقىلاۋ ءتارتىبى ساقتالادى»، — دەدى ساعىنتايەۆ.
ول قازاقستان تاراپى ەكىجاقتى ەكونوميكالىق ىنتىماقتاستىق پەن شەكارالىق، كولىكتىك، فيتوسانيتارلىق جانە ۆەتەرينارلىق باقىلاۋ، كەدەندىك جانە سالىقتىق اكىمشىلىكتەندىرۋدەگى ءوزارا ارەكەتتەستىك ماسەلەلەرى بويىنشا سىندارلى ديالوگقا دايىن ەكەنىن اتاپ ءوتتى.
“ءبىز الداعى ۋاقىتتا دا قىرعىزستاندىق ارىپتەستەرگە ەاەو قۇقىعى مەن نورمالارىنا بەيىمدەلۋگە كومەك كورسەتۋگە ءازىرمىز”، — دەپ تۇيىندەدى ساعىنتايەۆ.
قازاق-قىرعىز شەكاراسىنداعى پروبلەمالار 10 قازاندا باستالدى. قازاقستان بيلىگىنىڭ مالىمدەمەسى بويىنشا، مۇنىڭ ءبارى «سۇر» يمپورتقا قارسى كۇرەستەن كەيىن تۋىنداعان. 18 قازاندا ساپار يساكوۆ استاناعا جۇمىس ساپارىمەن كەلگەن ەدى. ساپار بارىسىندا قىرعىز پرەمەرى تەكسەرىس كەزىندە جەكە جۇگى بار ازاماتتار، جولاۋشىلارى بار رەيستىك اۆتوبۋستار، جەڭىل كولىكتەر مەن بوس جۇك كولىكتەرىنە باسىمدىق بەرۋ تۋرالى ۋاعدالاستى. وسىدان كەيىن اۆتوكولىكتەر شەكارادان جىلدام وتكىزىلە باستادى.
https://www.youtube.com/watch؟v=j2J-cn9qETI
