10 synyp oqýshylary Qymbat Baisapina men Nurai Janatbekqyzynyń «Jańbyr sýyn jinaityn drenaj júiesi jáne zamanaýi qaladaǵy joldyq ekoinfrastrýktýra» atty jobasy qazylar alqasynyń joǵary baǵasyna ie bolǵan. Jalpy jas zertteýshiler bul taqyryptaǵy eńbekterin 2 jyl buryn qolǵa alǵan.
– Bul jobany qolǵa alýymyzǵa qalamyzdyń kóshelerindegi jaǵdai sebep boldy. Jasyratyny joq – jaýyn jaýsa Semei kóshelerine sý jinalatynyn kózimiz kórip júr. Biz baqylaǵan Á.Táńirbergenov, Glinka, Selevin, Qabanbai batyr, Abai, Sh.Qarjaýbaiuly syndy negizgi kóshelerdiń ózinde osy máselemen jii betpe-bet kelemiz. Bul óz kezeginde asfalttiń búlinip, ylǵaldyń áserinen qoparylýynan bólek, jaiaý júrginshi men kólik keptelisine alyp keledi. Osyǵan orai, qala ishi jol boiynda jańbyr men erigen qar sýynyń jinalýyn boldyrmaityn, asfalt buzylýynyń aldyn alyp, jol jiegin kógaldandyrýǵa múmkindik beretin drenaj júiesi men ekologiialyq infraqurylym modelin ázirleýdi júzege asyrmaqpyz, – deidi Nurai Janatbekqyzy.
Sonymen qatar, zamanaýi qala turǵyndary úshin yńǵaily, ári qaýipsiz jol qozǵalysy josparyn jasap shyǵarýdy kózdep otyrǵan Qymbat pen Nuraidyń zertteý obektileri jol, drenaj, topyraq, jańbyr sýy, kógaldandyrý, jel energiiasy. Drenaj júiesiniń maketin jasaýǵa jáne matematikalyq esepteýleri júrgizýge qalamyzdaǵy Qaraǵaily aýdany zertteý obektisi retinde alyndy. Bul aimaqta jańbyrdyń jii jaýýy men jańbyr sýynyń jii turyp qalýy jáne baiqalady. 3D shemasy SketchUp baǵdarlamasynyń kómegimen jasaldy.
Zertteý suraqtaryna jaýap bere otyra, drenaj júiesi men qaladaǵy jol infrastrýktýrasynyń erekshe modeli jasap shyǵaryldy. Ol óziniń tiimdiligi men ekologiialyq tazalyǵymen erekshelenedi. Sondai-aq oqýshylar bul jobany kez-kelgen qalada iske qosýǵa bolatyndyǵyn aityp otyr.
Semei qalasyndaǵy fizika-matematika baǵytyndaǵy Nazarbaev Ziiatkerlik mektebiniń baspasóz qyzmeti
