Joǵary deńgeidegi ekijaqty kezdesý aiasynda mańyzdy memleketaralyq qujattarǵa,
onyń ishinde Qazaqstan tarapyna sýperkompiýterdi usyný jobasy boiynsha yntymaqtastyq týraly QR men QHR Úkimetteri arasyndaǵy kelisimge qol qoiyldy.
Álemdegi eń óndirgish úzdik 500-ge kiretin sýperkompiýterdi elimizdiń jetekshi joǵary oqý orny – álemniń 130-dan astam joǵary oqý oryndaryn biriktiretin Jibek joly ýniversitetteri Aliansynyń Halyqaralyq IT-tehnoparkin qurý boiynsha jumys isteitin ál-Farabi atyndaǵy QazUÝ alady.
«Silicon Valley» modeli boiynsha qurylatyn IT-tehnoparki men sýperkompiýterlik jáne bultty esepteýler ortalyǵy QazUÝ-dyń «Joǵary tehnologiialar aimaǵynda» ornalastyrylady.
Qazirgi ýaqytta infraqurylym men qajetti úi-jailardy daiyndaý jumystary qarqyndy júrgizilýde, sondai-aq bul jerde «Indýstriia 4.0» ujymdyq paidalaný ortalyǵy men kórme ortalyǵy ornalasatyn bolady. QazUÝ-da qurylatyn álemdik deńgeidegi IT-tehnoparki Elbasynyń IT-indýstriiasyn qalyptastyrý jáne eldiń jahandyq básekege qabilettiligin arttyrý boiynsha qoiǵan mindetterin júzege asyrý draiverleriniń birine ainalmaq.
Pekindegi Qazaqstan-Qytai iskerlik keńesiniń altynshy otyrysynda sóilegen sózinde Memleket basshysy Qazaqstan qytaidyń kompaniialarymen birlesken innovatsiialyq kásiporyndar, tehnoparkter men IT-ortalyqtar qurýǵa múddeli ekenin atap ótti.
Úkimet delegatsiiasynyń quramynda Qytaiǵa sapary barysynda QazUÝ rektory, akademik Ǵalym Mutanov belgili joǵary tehnologiialyq kompaniialardyń ókilderimen kezdesip, ǵylymi-tehnikalyq yntymaqtastyqty keńeitý máselelerin talqylady. «Inspur» kompaniiasymen joǵary tehnologiialar salasyndaǵy yntymaqtastyq týraly memorandýmǵa qol qoiyldy. Taraptar joǵary ónimdi serverler, QR-da derekterdi saqtaý júieleri men derbes kompiýterlerdi óndirý boiynsha birlesken jobany iske asyrý, sondai-aq aldyńǵy qatarly sandyq tehnologiialar transferti jáne Big Data, zattar interneti, jasandy intellekt, bultty tehnologiialar jáne t. b. baǵyttarda ǵylymi zertteýler júrgizý máselelerin talqylady.
Mundai jobalardy tabysty júzege asyrý «Tsifrlyq Qazaqstan» memlekettik baǵdarlamasyn iske asyrýǵa yqpal etip, ǵylymdy qajetsinetin tehnologiialardy damytý men el ekonomikasyn jańǵyrtý lokomotivteriniń biri bolmaq.
