QazUÝ Peterbor ýniversitetimen memorandýmǵa qol qoidy
QazUÝ rektory Janseiit Túimebaev Peterbor memlekettik ýniversitetiniń rektory Igor Maksimtsevpen resmi kezdesip, aldaǵy ýaqytta atqarylatyn ortaq jumystar men yntymaqtastyq baǵyttaryn talqylady.
Óz sózinde Igor Maksimtsev Reseidiń RAEX-100 úzdik joǵary oqý oryndarynyń reitinginde 37-oryndy ielenetin Peterbor ýniversitetiniń jetistikterine toqtaldy. Ýniversitette 12 fakýltet, 32 ǵylymi mektep, 11 dissertatsiialyq keńes, 8 ǵylymi-zertteý ortalyǵy, 10 zerthana jumys isteidi. JOO Resei Bilim jáne ǵylym ministrligi janyndaǵy JAK tizimine engizilgen jeti ǵylymi retsenziialanǵan jýrnaldyń quryltaishysy bolyp tabylady.
QazUÝ basshysy óz sózinde reseilik áriptesterdi Ál-Farabi atyndaǵy QazUÝ-da ǵylymdy damytý baǵytynda iske asyrylyp otyrǵan jobalarmen tanystyrdy. Rektor Reseidiń joǵary oqý oryndarymen ǵylym jáne joǵary bilim salasyndaǵy QazUÝ-dyń yntymaqtastyǵy artyp kele jatqanyn atap ótip, Peterbor ýniversitetimen áriptestikti nyǵaitýǵa nietti ekenin jetkizdi.
Júzdesý sońynda akademiialyq utqyrlyq baǵdarlamalary, qos diplom jáne ǵylymi-zertteý jumystary boiynsha yntymaqtastyq memorandýmyna qol qoiyldy.
QazUÝ-dyń Baspasóz qyzmeti
