Eýroparlament ókilderi aldymen «Ál-Farabi» mýzeiin aralap, qara shańyraq tarihyna qanyqty. Sonymen qatar qonaqtarǵa QazUÝ janyndaǵy Pan Gi Mýn institýtynyń qyzmeti baiandalyp, oqý ornynyń damý jospary tanystyryldy.
Delegatsiia quramyna «Qazaqstan Respýblikasy – Eýropalyq odaq» Parlamenttik yntymaqtastyq komitetindegi Eýropalyq Parlament delegatsiiasynyń tóraǵasy, Kólik jáne týrizm komitetiniń 3-shi vitse-tóraǵasy Andris Ameriks (Latviia), elshi, QR EO ókildiginiń basshysy Kestýtis Iankaýskas, QR-EO Parlamenttik yntymaqtastyq komitetindegi Eýropalyq Parlament delegatsiiasynyń múshesi, EP Syrtqy ister komitetiniń múshesi Frantsisko Millan-Mon (Ispaniia) jáne basqa da uiym músheleri kirdi.
QazUÝ-dyń Basqarma Tóraǵasy – Rektor Janseiit Túimebaev qonaqtarǵa arnap sóz sóiledi. Ol 2010 jyldan bastap Qazaqstan Bolon protsesiniń tolyqqandy múshesi jáne Joǵary bilimniń eýropalyq keńistiginiń qatysýshysy mártebesine ie ekenin atap ótti. Qazirgi ýaqytta ol Bolon protsesiniń baqylaý tobynyń teń tóraǵasy bolyp tabylady. QazUÝ álemniń 500-den astam úzdik jáne jetekshi ýniversitetterimen yntymaqtastyqta, kóptegen iri halyqaralyq uiymdardyń quramyna kiredi jáne bilim berý baǵdarlamalary men ǵylymi baǵyttarynyń aýqymy asa keń. 16 qosdiplomdy bilim berý baǵdarlamasy Eýroodaqqa múshe 10 eldiń joǵary oqý oryndarymen birlesip iske asyrylýda. QazUÝ-dyń segiz fakýlteti Eýroodaq elderiniń 13 seriktes joǵary oqý ornymen yntymaqtastyq ornatqan. Ýniversitette 92 bilim berý baǵdarlamasy aǵylshyn tilinde oqytylady.
Qara shańyraq Birikken Ulttar Uiymynyń «Akademiialyq yqpal etý» baǵdarlamasynyń turaqtylyq jónindegi jahandyq haby retinde maqsatty túrde jumys istep, oqytýshy-professorlar qyzmetin internatsionaldandyrý jolymen ǵylymi-bilim berý baǵdarlamalarynyń deńgeiin arttyrýda.
QazUÝ-da jekelegen eýropalyq eldermen yntymaqtastyq jónindegi ortalyqtar tabysty jumys isteýde. Rektor sóz sońynda: «Biz Qazaqstannyń Eýropalyq odaqpen halyqaralyq mádeni-bilim berý yntymaqtastyǵyn integratsiialaý jáne damytýǵa asa múddelimiz. Osylaisha QazUÝ eýropalyq eldermen ǵylymi zertteýlerdi damytý salasyndaǵy yntymaqtastyqqa óz úlesin qosady», – dep, bul kezdesýdiń ózara yqpaldastyqty nyǵaita túserine zor senim bildirdi.
QR-EO Parlamenttik yntymaqtastyq komitetindegi Eýroparlament delegatsiiasynyń múshesi Frantsisko Millan-Mon jinalǵandarǵa, ásirese jastarǵa Eýroparlament qyzmetine qyzyǵýshylyq tanytqany úshin alǵysyn bildirdi. Ol óz sózinde Qazaqstan Respýblikasynyń Prezidenti Q.Toqaev bastaǵan reformalardyń der kezinde qabyldanǵanyna toqtala kele, QazUÝ jetistikterin joǵary baǵalady. «Ýniversitet shyǵystyń uly ustazy ál-Farabi murasyn saqtai bildi, sonymen birge bolashaqqa senimmen qaraidy, tsifrlandyrý jumystaryn júrgizýde. Siz halyqaralyq ýniversitettermen tyǵyz bailanys ornyqqany týraly, eýropalyq órkeniet qaǵidalary men BUU qundylyqtary jaiynda baiandadyńyz. Ortalyq Aziiada ǵana emes, sonymen qatar Eýroodaq elderine de tanymal ýniversitetke tolaǵai tabystar tileimin», – degen lebizin jetkizdi.
Sondai-aq júzdesýge QR Parlamenti Májilisiniń Halyqaralyq ister, qorǵanys jáne qaýipsizdik komitetiniń tóraiymy Aigúl Quspan qatysyp, Eýroodaq jumysyna kórsetken qyzyǵýshylyq úshin alǵysyn jetkizdi.
Kezdesý barysynda stýdent jastar suraqtar qoiyp, delegatsiia múshelerinen tushymdy jaýaptar aldy. Qatysýshylar ózara yqpaldastyqtyń perspektivalyq baǵyttary týraly oi bólisip, yntymaqtastyqtyń mańyzdy máseleleri boiynsha pikir almasty.
Shara sońynda qurmetti qonaqtar stýdenttermen estelik sýretke tústi.
Ál-Farabi atyndaǵy QazUÝ-dyń Baspasóz qyzmeti
