Ál-Farabı atyndaǵy Qazaq ulttyq ýnıversıtetinde ushqyshsyz avıasıany damytýǵa arnalǵan ınovasıalyq ortalyq ashyldy, dep habarlaıdy Dala News.
Jańa ortalyq QazUÝ men «Aerial Solutions» kompanıasynyń birlesken jobasy aıasynda iske qosyldy. Munda otandyq dron úlgilerin ázirleý, oqý-óndiristik zerthanalar qurý, synaq polıgonyn iske qosý, sondaı-aq dýaldy bilim berý men sertıfıkattaý baǵdarlamalaryn engizý josparlanǵan.
Ortalyqta stýdentter men oqytýshylardyń qatysýymen ǵylymı-zertteý jáne tájirıbelik-konstrýktorlyq jumystar júrgizilip, ushqyshsyz ushý apparattary jasalady. Sonymen qatar drondardy ishki jáne halyqaralyq naryqqa shyǵarý, startaptardy qoldaý jáne tehnologıalardy komersıalandyrý kózdelip otyr.
Ashylý saltanatynda sóz sóılegen QazUÝ rektory Janseıit Túımebaev bul bastamanyń eldiń tehnologıalyq damýy úshin mańyzy zor ekenin atap ótti.
«Prezıdent Qasym-Jomart Toqaev jasandy ıntellekt pen sıfrlyq tehnologıalardy damytý básekege qabilettiligimizdiń negizgi sharty ekenin aıtqan edi. Bul ortalyq zamanaýı drondar jasap, qurastyratyn, bilikti mamandar daıarlaıtyn mańyzdy alańǵa aınalady. Munda jasalǵan tehnologıalar ekonomıkanyń túrli salasynda tıimdi qoldanylatyn bolady»,- dedi ol.
«Aerial Solutions» kompanıasynyń ókili Perızat Qudaıbergenovanyń aıtýynsha, ortalyq ǵylymdy, bilim men óndiristi biriktirip, halyqaralyq standarttarǵa saı mamandar daıarlaýǵa múmkindik beredi. Onyń sózinshe, bul joba ónerkásip, aýyl sharýashylyǵy jáne sıfrlyq monıtorıń salalaryna serpin beredi.
Qorǵanys mınıstrligi ókilderi de jańa ortalyqtyń eldiń áýe keńistigin damytýǵa jáne qaýipsizdik salasyna úles qosatynyna senim bildirdi.
Joba Qazaqstannyń azamattyq ushqyshsyz avıasıa salasyn damytýǵa, sıfrlyq ınfraqurylymdy nyǵaıtýǵa jáne otandyq tehnologıalardy jańa deńgeıge shyǵarýǵa baǵyttalǵan.
