Rýhani sharanyń shymyldyǵy uly aqynnyń kitaptary men sýretteri qoiylǵan Ál-Farabi kitaphanasynyń jáne Jambyl, Súiinbai mýzeileriniń «Jambyl álemi» kóshpeli kórmesimen ashyldy.
Oqý orny rektorynyń keńesshisi Málik Otarbaev alqaly jiyndy ashyp, aldymen Ál-Farabi atyndaǵy QazUÝ-dyń Basqarma Tóraǵasy – Rektory Janseiit Túimebaevtyń quttyqtaý hatyn jetkizdi. Hatta: «Jyr alyby Jambyl Jabaev – tek qazaq halqynyń ǵana emes, túrki dúniesiniń álemdik deńgeige kóterilgen tuǵyry biik tulǵasy. Ult maqtanyshyn qarashańyraq tórinde dáriptep, ólmes muralaryn jastarǵa nasihattaýdyń mańyzy zor», – delingen.
Rektor keńesshisi Málik Nurjanuly bul is-shara Jambyl mereitoiy aiasynda ýniversitet qabyrǵasynda qolǵa alynǵan úlken istiń bastamasy ekenin aita kele, bilim ordasynda uly aqyn shyǵarmashylyǵy boiynsha irgeli zertteý jumystarynyń atqarylyp jatqanyn tilge tiek etti.
– Biyl aqynnyń 175 jyldyǵyna orai, QazUÝ-dyń «Jambyl» ǵylymi-zertteý ortalyǵynyń atsalysýymen 10 tomdyq jaryq kórdi. Qurastyrǵan – jambyltanýshy Naǵashybek Qapalbek. Sonymen qatar Jambyl murasyn nasihattaý boiynsha taǵy bir 10 tomdyq daiyndalý ústinde. Onyń 4 tomdyǵy belgili ǵalym Janǵara Dádebaevtyń qurastyrýymen jaryq kórdi. Osyndai ǵylymi izdenister aldaǵy ýaqytta jalǵasa bermek, – dedi keńesshi.
Aitýly rýhani sharaǵa Mádenietterdi jaqyndastyrý ortalyǵynyń bas ǵylymi qyzmetkeri, jazýshy-jambyltanýshy Naǵashybek Qapalbekuly, «Jambyl» ádebi-memorialdyq mýzeiiniń direktory Saltanat Jambylova, Súiinbai ádebi-memorialdyq mýzeiiniń direktory Murat Qobdaliev, «Rýhani jańǵyrý» ǵylymi-innovatsiialyq ortalyǵy» jobalyq ofisiniń jetekshisi Nurǵali Oraz, QazUÝ-dyń «Jambyl» ǵylymi-zertteý ortalyǵynyń jetekshisi Almasbek Anyqbek, jambyltanýshy ǵalym Temirhan Tebegenov, Ádilǵazy Qaiyrbekov, Baiǵali Esenáliev, Ertai Aiǵaliuly syndy rýhaniiat ókilderi qatysty. Jiynda sóz alǵan jambyltanýshylar kemeńger tulǵa jaily tolǵamdarymen bólisti.
Arnaiy shaqyrylǵan qonaqtar, oqytýshylar men bilim alýshy jastar kórmede Jambyl murasymen etene tanysty. Sirek kezdesetin materialdar, fotosýretter, arhiv qujattary men jádigerlerdiń biregei keshenin tamashalap, aqynnyń ómiri men shyǵarmashylyǵy týraly mańyzdy maǵlumatqa qanyqty.
Jazýshy Naǵashybek Qapalbekuly aqynnyń daralyǵy jóninde sóz qozǵap, Jambyldyń danalyq syry aqyndyq qasietinde ekenine nazar aýdaryp, onyń óleńderi álemniń 160 tiline aýdarylǵanyn airyqsha atap ótti.
Jambyl murasyn dáripteý maqsatynda elimizde atqarylǵan jumystardy egjei-tegjeili baiandai kele, ýniversitet basshysy Janseiit Túimebaevtyń Jambyl esimin ulyqtaýǵa qosqan súbeli úlesin atap kórsetti. Túrkiiada elshilik qyzmette júrgende sol elden Jambyl esimine kóshe berý, Ankarada Súiinbai babamyzǵa eskertkish ornatý jáne Súiinbai atynda saiabaq ashý isine uiytqy bolǵanyn jáne Súiinbai men Jambyl kitaptarynyń túrik tilinde taralýyna óz septigin tigizgenin rizashylyqpen jetkizdi.
Sonymen qatar, «Jambyl aptalyǵynyń» ashylý saltanaty aiasynda túrik tiline aýdarylǵan «Kóroǵly» dastanynyń tusaýkeser rásimi ótti. Túrki halyqtaryna ortaq týyndynyń Jambyl Jabaev jyrlaǵan nusqasy engen jinaq Ál-Farabi atyndaǵy QazUÝ men Eýraziia jazýshylar odaǵyna qarasty «Bengý» baspasynyń qoldaýymen jaryq kórdi. Tárjimalaǵan – jazýshy-aýdarmashy Málik Otarbaev.
Kitaptyń alǵysózin QazUÝ rektory Janseiit Túimebaev jazǵan. Onda Jambyl Jabaevtyń óz óleń-jyrlarynda ómir súrgen ýaqyttyń tamyryn dóp basyp, zaman tynysyn aiqyn beinelegeni baiandalady. Sonymen qatar ómirin óleńmen órnektei bilgen aqynnyń ózinen burynǵy aqyndardyń jyr-dastandary men aitystaryn jatqa oryndap, tańnan-tańǵa jyrlaǵanyn tanystyra kele, jyrshy aqynnyń jadynda saqtalǵan «Kóroǵly» jyrynyń túrki álemi ádebietine qosylǵan taptyrmas qazyna bolaryna senim bildiredi.
Jazýshy Nurǵali Oraz jiynda sóz alyp, jýyrda HVI halyqaralyq Ankara kitap kórmesinde jinaqtyń tusaýkeser rásimi joǵary deńgeide júzege asqanyn atap ótti. Qazaqstannyń Túrkiiadaǵy elshiligi qoldaý bildirgen sharaǵa QazUÝ delegatsiiasy qurmetti qonaq retinde qatysqanyn aitty. «Basqosýda Pamýkkale ýniversitetiniń professory Nergiz Birai, Eýraziia jazýshylar odaǵynyń tóraǵasy Iakýp Ómeroǵly Jambyl Jabaevtyń qairatkerlik bolmysy jáne qazaq ádebieti men ult rýhaniiatyndaǵy rólin tarazylap, Jambyl nusqasy túrki álemi mádenietine qosylǵan sony jańalyq ekenin alǵa tartty», – dedi jazýshy.
Aita ketsek, aptalyq aiasynda «Aq dombyra qolǵa alyp...» atty jyr keshi, Jambyl urpaqtarymen kezdesý, «Jambyl jáne túrki álemi» halyqaralyq onlain-konferentsiia ótkizilip, Jambyl jáne Qarasai aýdandaryndaǵy Súiinbai – Jambyl kesenesi men mýzeiine ekspeditsiia uiymdastyrylatyn bolady.
