Halyqaralyq Farabi forýmy adamzattyń uly oishyly – Ál-Farabidiń murasyn tereń zertteýge, keńinen taratyp, nasihattaýǵa arnalǵan iri ǵylymi is-shara. Sharanyń maqsaty – oishyl ǵalymnyń bai murasyn jańa qyrynan zertteý, Farabi murasy arqyly qazirgi qoǵam damýynyń rýhani, tarihi jáne filosofiialyq negizderin túsiný, qazaqstandyq jáne sheteldik farabitanýshylardy biriktirý, jańa zertteýlerdi saralaý.
Forým jumysyn quttyqtaý sózben ashqan ál-Farabi atyndaǵy QazUÝ-dyń Basqarma Tóraǵasy-Rektory Janseiit Túimebaev: «Búgingi halyqaralyq Forým ál-Farabi qubylysyn zamanaýi taldaýdy jáne tereń zertteýdi talap etedi. Bizdiń aldymyzda ál-Farabi týraly barlyq aqparatty biriktirý mindet tur. Forýmnyń tarihi missiiasy – Farabi ilimi arqyly jastardyń oi-órisin keńeitý, tarihi jáne zamanaýi qundylyqtardy toǵystyrý arqyly farabitanýdaǵy jańa baǵyttardy damytý», – dep atap ótti.
Forýmda sóilegen sózinde Iran Islam Respýblikasynyń Almatydaǵy Bas konsýly Mýhsin Faǵanidiń pikirinshe, Farabi – óz zamanynyń danyshpany, ózinen keiingi oishyldardyń oi órisine tereń de eleýli áser qaldyryp, islam órkenietiniń gúldenýine negiz bola bilgen ǵulama ǵalym. Sondyqtan kópshilik ony eń uly musylman filosofy jáne islam filosofiiasynyń negizin qalaýshy dep ataidy.
Forýmnyń ashylý saltanatynda Nur-Múbarak Egipet islam mádenieti ýniversitetiniń rektory Muhammed ash-Shahhat Ál-Djindi (Egipet), Almaty qalasyndaǵy Ózbekstannyń Bas konsýly – Abror Fathýllaev (Ózbekstan), jáne t. b. sóz sóiledi.
Forým jumysyna QR Ǵylym jáne joǵary bilim, Aqparat jáne qoǵamdyq damý, Mádeniet jáne sport, Syrtqy ister ministrlikteriniń ókilderi, QR UǴA músheleri, Qazaqstandaǵy sheteldik konsýldar, sheteldegi ál-Farabi ortalyqtarynyń ókilderi, ǵalymdar men diplomattar, Túrkiia, Niderlandy, Resei, Ózbekstannan kelgen jas ǵalymdar qatysty.
Forýmǵa qatysýshylar ǵylym men bilim berýdiń integratsiiasyna, qazirgi qoǵamnyń rýhani-adamgershilik jáne ziiatkerlik mádenietin jetildirýge qatysty ózekti máselelerdiń keń aýqymyn talqylady.
Forým aiasynda «Ábý Nasyr Ál-Farabidiń murasy jáne álemdegi psihologiialyq ǵylymnyń damytý», «Ál-Farabidiń tárbie tili: mádenietaralyq qarym-qatynas jáne ulttyq bolmys kontekstindegi tulǵa» jáne t. b. pikirtalas alańdary uiymdastyrylyp, arnaiy seminarlar ótýde.
Ál-Farabi atyndaǵy QazUÝ-dyń Baspasóz qyzmeti
