حالىقارالىق فارابي فورۋمى ادامزاتتىڭ ۇلى ويشىلى – ءال-فارابيدىڭ مۇراسىن تەرەڭ زەرتتەۋگە، كەڭىنەن تاراتىپ، ناسيحاتتاۋعا ارنالعان ءىرى عىلىمي ءىس-شارا. شارانىڭ ماقساتى – ويشىل عالىمنىڭ باي مۇراسىن جاڭا قىرىنان زەرتتەۋ، فارابي مۇراسى ارقىلى قازىرگى قوعام دامۋىنىڭ رۋحاني، تاريحي جانە فيلوسوفيالىق نەگىزدەرىن ءتۇسىنۋ، قازاقستاندىق جانە شەتەلدىك فارابيتانۋشىلاردى بىرىكتىرۋ، جاڭا زەرتتەۋلەردى سارالاۋ.
فورۋم جۇمىسىن قۇتتىقتاۋ سوزبەن اشقان ءال-فارابي اتىنداعى قازۇۋ-دىڭ باسقارما توراعاسى-رەكتورى جانسەيىت تۇيمەبايەۆ: «بۇگىنگى حالىقارالىق فورۋم ءال-فارابي قۇبىلىسىن زاماناۋي تالداۋدى جانە تەرەڭ زەرتتەۋدى تالاپ ەتەدى. ءبىزدىڭ الدىمىزدا ءال-فارابي تۋرالى بارلىق اقپاراتتى بىرىكتىرۋ مىندەت تۇر. فورۋمنىڭ تاريحي ميسسياسى – فارابي ءىلىمى ارقىلى جاستاردىڭ ءوي-ورىسىن كەڭەيتۋ، تاريحي جانە زاماناۋي قۇندىلىقتاردى توعىستىرۋ ارقىلى فارابيتانۋداعى جاڭا باعىتتاردى دامىتۋ»، – دەپ اتاپ ءوتتى.
فورۋمدا سويلەگەن سوزىندە يران يسلام رەسپۋبليكاسىنىڭ الماتىداعى باس كونسۋلى مۋحسين ءفاعانيدىڭ پىكىرىنشە، فارابي – ءوز زامانىنىڭ دانىشپانى، وزىنەن كەيىنگى ويشىلداردىڭ وي ورىسىنە تەرەڭ دە ەلەۋلى اسەر قالدىرىپ، يسلام وركەنيەتىنىڭ گۇلدەنۋىنە نەگىز بولا بىلگەن عۇلاما عالىم. سوندىقتان كوپشىلىك ونى ەڭ ۇلى مۇسىلمان فيلوسوفى جانە يسلام فيلوسوفياسىنىڭ نەگىزىن قالاۋشى دەپ اتايدى.
فورۋمنىڭ اشىلۋ سالتاناتىندا نۇر-مۇباراك ەگيپەت يسلام مادەنيەتى ۋنيۆەرسيتەتىنىڭ رەكتورى مۇحاممەد اش-شاححات ءال-دجيندي (ەگيپەت)، الماتى قالاسىنداعى وزبەكستاننىڭ باس كونسۋلى – ابرور فاتحۋللايەۆ (وزبەكستان)، جانە ت. ب. ءسوز سويلەدى.
يسلام كونفەرەنسياسى (COMSTECH) ۇيىمىنىڭ عىلىم جانە تەحنولوگيالىق وپەراسيالار كوميتەتىنىڭ باس ۇيلەستىرۋشىسى چاۋدحاري مۇحاممەد يكبال، تۇركى حالىقتارى فيلوسوفيالىق قوعامىنىڭ تەڭ ءتوراعالارى: فيلوسوفيا عىلىمدارىنىڭ دوكتورى، ءال-فارابي اتىنداعى قازۇۋ پروفەسسورى تۇرسىن عابيتوۆ جانە فيلوسوفيا عىلىمدارىنىڭ دوكتورى، پروفەسسور، حادجەتتەپە وزكۋل چوبانوگلۋ ۋنيۆەرسيتەتىنىڭ (تۇركيا) تۇرىك حالىقتىق ءبىلىم بەرۋ كافەدراسىنىڭ مەڭگەرۋشىسى جانە ت. ب. فورۋمعا ءوز قۇتتىقتاۋلارىن جولدادى.
فورۋم جۇمىسىنا ق ر عىلىم جانە جوعارى ءبىلىم، اقپارات جانە قوعامدىق دامۋ، مادەنيەت جانە سپورت، سىرتقى ىستەر مينيسترلىكتەرىنىڭ وكىلدەرى، ق ر ۇعا مۇشەلەرى، قازاقستانداعى شەتەلدىك كونسۋلدار، شەتەلدەگى ءال-فارابي ورتالىقتارىنىڭ وكىلدەرى، عالىمدار مەن ديپلوماتتار، تۇركيا، نيدەرلاندى، رەسەي، وزبەكستاننان كەلگەن جاس عالىمدار قاتىستى.
فورۋمعا قاتىسۋشىلار عىلىم مەن ءبىلىم بەرۋدىڭ ينتەگراسياسىنا، قازىرگى قوعامنىڭ رۋحاني-ادامگەرشىلىك جانە زياتكەرلىك مادەنيەتىن جەتىلدىرۋگە قاتىستى وزەكتى ماسەلەلەردىڭ كەڭ اۋقىمىن تالقىلادى.
فورۋم اياسىندا «ءابۋ ناسىر ءال-فارابيدىڭ مۇراسى جانە الەمدەگى پسيحولوگيالىق عىلىمنىڭ دامىتۋ»، «ءال-فارابيدىڭ تاربيە ءتىلى: مادەنيەتارالىق قارىم-قاتىناس جانە ۇلتتىق بولمىس كونتەكستىندەگى تۇلعا» جانە ت. ب. پىكىرتالاس الاڭدارى ۇيىمداستىرىلىپ، ارنايى سەمينارلار وتۋدە.
ءال-فارابي اتىنداعى قازۇۋ-دىڭ باسپا ءسوز قىزمەتى
