96 jyldyq tarihy bar Qazaq ulttyq agrarlyq zertteý ýniversitetiniń aktivteri talan-tarajǵa salynǵan. Bul týraly "AMANAT" partiiasy málimdedi, dep habarlaidy Dalanews.kz.
Almatyda "AMANAT" partiiasy janyndaǵy Sybailas jemqorlyqqa qarsy is-qimyl jónindegi respýblikalyq keńestiń otyrysy ótip, ýniversitettiń memleket menshigine qaitarylýy máselesi talqylandy. Jiynǵa memlekettik organ ókilderi, professor-oqytýshylar, qoǵam belsendileri jáne qala turǵyndary qatysty.
Keńes tóraǵasy, Májilis depýtaty Erlan Sairov ádilettilikti qalpyna keltirý jáne zańsyz áreketterge jol bergen azamattardy jaýapqa tartý qajettigin aitty.
"2000 jyldardyń basynda ýniversitetke tiesili úsh jataqhana, bes iri zerthana jáne alty gektar jer belgisiz sebeptermen jekemenshikke ótip ketken. Bul – sybailas jemqorlyqtyń aiqyn kórinisi. Munyń artynda sybailas jemqorlyq áreketi turǵany anyq. Búginde "AMANAT" partiiasynyń atsalysýymen Bas prokýratýranyń jáne Sybailas jemqorlyqqa qarsy is-qimyl agenttiginiń qyzmetkerleri osy máselemen ainalysyp jatyr. Árine, osy jyldar aralyǵynda menshikter ekinshi, úshinshi, tórtinshi qolǵa ótip ketti. Soǵan qaramastan, ádildik qalpyna kelýi kerek. Balalarymyzdyń aýzynan jyryp alynǵan barlyq yryzdyqty qaitarýymyz qajet. Buǵan jol bergen azamattar quqyqtyq jaýapkershilikke tartylýǵa tiis", – dedi Erlan Sairov.
Óz kezeginde, Sybailas jemqorlyqqa qarsy is-qimyl agenttiginiń Sotqa deiingi tergeý qyzmeti basshysynyń orynbasary Qýandyq Rashit ýniversitet nysandaryn jeke qolǵa berýge qatysty zań buzýshylyq faktilerine toqtaldy.
"Agenttik byltyrdan beri osy oqý ordasynyń múlikterin jeke tulǵalarǵa satý derekteri boiynsha tergeý amaldaryn júrgizip keledi. Qazirgi ýaqytta tiisti saraptamalar jasalýda. Quzyretti organdardyń mamandarymen birge atalǵan menshikter jeke tulǵalarǵa qandai jolmen berilip, nendei zań buzýshylyq jasalǵany tekserilip jatyr. Osy faktiler boiynsha tergeý amaldary qolǵa alyndy. Budan basqa da nysandarǵa qatysty tergeý júrgizilýde", – dedi Qýandyq Rashit.
Bul rette, Qazaq ulttyq agrarlyq zertteý ýniversiteti rektorynyń birinshi orynbasary Pirimqul Ibragimov atalǵan bilim ordasy tergeý amaldaryn júrgizýge jan-jaqty atsalysyp jatqanyn jetkizdi.
"Ózderińizge málim, elimizde 120-ǵa jýyq joǵary oqý orny bar. Sonyń ishinde ulttyq dárejedegi sanaýly bilim ordasynyń biri – osy Qazaq ulttyq agrarlyq zertteý ýniversiteti. Bul ýniversitettiń 96 jyldyq tarihy bar ekenin de bilesizder. Aýyl sharýashylyǵy salasyna qajet mamandar daiarlaityn birden-bir bilim ordasy da – osy. Agrarlyq saladaǵy bilim men ǵylymnyń kóshbasshysymyz. Soǵan qaramastan, bir kezderi ýniversitet qabyrǵasynda sybailas jemqorlyq faktileri boldy. Quzyrly organdar onyń anyq-qanyǵyn áli de zerttep, zerdelep jatyr. Al tergeý amaldaryn júrgizýge qajet barlyq material ýniversitet tarapynan tolyq qamtamasyz etildi. Eń bastysy, Ádiletti Qazaqstanda ádiletti ýniversitet qurýymyz kerek", – dedi Pirimqul Ibragimov.
Al Almaty qalasynyń basqarma prokýrory Azat Turǵanbek atalǵan bilim ordasyndaǵy zańsyz áreketterdi anyqtaý jumysyna toqtaldy.
"Keiingi eki jylda Qazaq ulttyq agrarlyq zertteý ýniversitetiniń aktivterin memleket menshigine qaitarý baǵytynda qarqyndy jumys júrgizilip jatyr. Iaǵni, 2023 jyly Bas prokýratýranyń tapsyrmasyna sáikes, Almaty qalasynyń prokýratýrasy osy ýniversitette tekserý júrgizgen bolatyn. Sonyń nátijesinde, osy bilim ordasyna tiesili jyljymaityn múlikterdi zańsyz ielikten shyǵarý faktileri anyqtaldy. Biz bul faktini arnaiy esepke alý kitapshasyna tirkedik. Keiin osy is boiynsha ary qarai tekseris júrgizilip, protsestik sheshim qabyldaý úshin qujattar Sybailas jemqorlyqqa qarsy is-qimyl agenttiginiń Almaty qalasy boiynsha departamentine joldandy. Búginde «Bilikti nemese laýazymdyq ókilettikterdi asyra paidalaný» baby boiynsha is qozǵalyp, tergeý amaldary júrgizilýde. Tiisinshe, osy istiń búge-shigesi anyqtalyp, naqty tártiptik sheshim qabyldanady", – dedi Azat Turǵanbek.
Osy oraida, Qazaq ulttyq agrarlyq zertteý ýniversiteti "Agronomiia, selektsiia, biotehnologiia" kafedrasynyń professory Tastanbek Ataqulov bir kezderi atalǵan bilim ordasynda bolǵan zańsyzdyqtardy aitty.
"1967 jyly osy bilim ordasynyń qabyrǵasyn alǵash stýdent bolyp attaǵan edim. Sol ýaqyttan beri bul qara shańyraqtan bir eli ajyraǵan joqpyn. Taban aýdarmai azdy-kópti 58 jyl eńbek etip kelemin. Búgin aitylyp jatqan barlyq zańsyz áreket kóz aldymda jasaldy. Bárin bilemin. Alaida bizben eshkim aqyldasyp jatqan joq. Qoldan keler qairan bolmady. Birtindep oqý korpýsymyzdan da, jataqhanamyzdan da airyla bastadyq. Jeke adamdardyń enshisinde ketti. Bir kezderi Sátbaev, Fýrmanov (qazirgi Nazarbaev), Abai, Krasina (qazirgi Ýálihanov) kósheleri qiylysatyn tustaǵy sharshy jer tolyq Qazaq ulttyq agrarlyq zertteý ýniversitetine tiesili edi. Bir emes, eki birdei dene shynyqtyrý zalymyz boldy. Sonyń bári birtindep jeke adamdardyń ieligine ótip ketti", – dedi Tastanbek Ataqulov.
Jiyndy qorytyndylai kele, keńes tóraǵasy Erlan Sairov bir kezderi bilim ordasyna tiesili bolǵan jyljymaityn múlikterdi mindetti túrde qaitarý qajet ekenin jetkizdi. Bul baǵyttaǵy jumys aldaǵy ýaqytta da jalǵasyn taba beredi.
