"Qaztemirtrans" AQ-nyń laýazymdy tulǵalary para alǵany úshin sottaldy, dep habarlaidy Dalanews.kz.
Astana qalasynyń qylmystyq ister jónindegi aýdanaralyq sotynyń málimetinshe, "Qaztemirtrans" AQ filialdarynyń 4 basshysyna jáne 16 kásipkerge qatysty úkim shyǵaryldy.
"2019-2022 jyldary atalǵan filialdardyń direktorlary júk tasymaldaý úshin qajetti vagondardyń tapshylyǵy kezinde júk jóneltýshilerden vagondardy kedergisiz ótkizip jáne jalpy qamqorlyq jasaǵany úshin júieli túrde para alǵan. Is boiynsha para alýdyń 18 faktisi anyqtaldy", - deidi vedomstvo.
Alynǵan paralardyń jalpy somasy:
sottalýshy S. 13 mln 225 myń teńge,
sottalýshy A. 3 mln 480 myń teńge,
sottalýshy K. 19 mln 710 myń teńge alǵan.
Kásipker R. jalpy somasy 9 mln 879 myń teńge iri mólsherde para bergen. Sot sheshimimen úsh aiypty 7 jyl merizimge bas bostandyǵynan jáne ómirboiy laýazymdy qyzmet isteý quqyǵynan aiyryldy. Bir sottalýshy qaitys bolǵandyqtan, oǵan úkim shyǵarylǵan joq. Al para bergen kásipkerge 49 mln 395 myń teńge mólsherinde aiyppul túrinde jaza kesildi.
"Para berýshi shaǵyn jáne orta biznestiń 15 ókili qylmystyq jaýaptylyqtan bosatyldy. Sot olardyń qylmystyq quqyq buzýshylyqtardy "Qaztemirtrans" AQ-nyń laýazymdy tulǵalaryna táýeldi bolǵandyqtan jasaǵanyn, sondai-aq kinásin moiyndap, jasaǵan isterine shyn júrekten ókingenin, qylmysty ashýǵa jáne tergeýge kómekteskenin eskerdi", - deidi sot.
Úkim zańdy kúshine áli engen joq.
