Bilim ordasy 1963 jyly salynǵan mektep 103 orynǵa arnalǵan. Alaida mektepke 300-den astam bala barady. Osylaisha shaǵyn mektepte balalar eki aýysymmen oqýǵa májbúr.
Bir qabatty ǵimaratta akt zaly, jabdyqtalǵan fizika jáne informatika kabinetteri joq. Oqýshylar otyz oryndy býfetten tamaqtanyp júr. Ashana normalarǵa sai emes. Sondyqtan munda daiyn taǵamdar ákelinedi.
Al aýdanda turatyn 600-ge jýyq bala shalǵai mektepterge baryp bilim alýǵa májbúr.
Bul máseleniń jalǵyz sheshimi – jańa ǵimarat salý. Ol úshin qajetti qoldaýdy «Qaztsink» kompaniiasy kórsetedi.
Ken-metallýrgiia kásipornynyń negizgi aktivteriniń biri – oblys ortalyǵyna jaqyn ornalasqan «Altyntaý Kókshetaý» altyn óndirý bólimshesi.
Kókshetaý qalasynyń ákimdigi men kompaniia basshylyǵy bilim berý obektisin salý aiasynda yntymaqtastyq týraly memorandýmǵa qol qoidy.
– Biz óndiristik alańshalarymyz ornalasqan árbir eldi mekenniń ómirine atsalysýǵa tyrysamyz, – deidi «Qaztsink» JShS-nyń bas direktory Aleksandr Hmelev. – Bilim salasy bizdiń áleýmettik jumysymyzdyń basym baǵyttarynyń biri bolyp tabylady. Bul memorandým – mańyzdy máselelerdi sheshý jáne asa qajetti jobalardy júzege asyrý úshin memlekettik organdarmen tabysty yntymaqtastyqtyǵymyzdyń taǵy bir kórsetkishi. Jańa mekteptiń salynýy balalardyń bilim alý múmkindikterin keńeitý jolyndaǵy serpindi qadam bolatynyna senimdimin.
Mekteptiń eski ǵimaratyn buzý josparlanýda. Onyń ornyna aýdanda turatyn barlyq balalar syiatyn zamanaýi ári keń ǵimarat salynady. Ǵimaratta ashana, meditsinalyq kabinet, akt zaly, túrli pándik kabinetter jáne basqa da qajetti jailar bolady.
Eski mektepti buzý shyǵynyn ákimdik, al jańa mektepti salý shyǵynyn «Qaztsink» kompaniiasy kóterip otyr.
