Qarjyger bizdegi basshylyq pen qatardaǵy jumysshynyń alatyn aılyǵy jer men kókteı deıdi.
"Qatelespesem Qazpochtanyń ortalyq apparatynda isteıtin dókeı dırektordyń shotyna aı saıyn 1,2 mln teńge aýdarylady. Dál osy mekemede isteıtin qarapaıym operator terlep-tepship júrip aıyna 47 690 teńge alady eken ("Qazpochtadaǵy" eń tómengi aılyq). Dóńgelekter bolsaq dırektor operatorǵa qaraǵanda 24 ese kóp tabady", – deıdi Rysmambetov.
Onyń aıtýynsha Shveısarıa sekildi damyǵan elderde basshynyń qaramaǵyndaǵy qyzmetkerden bálenbeı ese asyryp aılyq alýyna jol berilmeıdi.
"Bul elde de Qazpochtaǵa uqsas uıym bar. Biraq jalaqy kelgende dál bizdegideı alshaqtyq joq. Pochta basshysynyń tabysy qyzmetkerdiń aılyǵynan 12 ese asyp ketse artynan sóz eredi, synǵa ushyraıdy.
Bizdiń túsinikke salsaq Shveısarıa temirjolynda isteıtin jolserik aıyna 6-8 myń frank jalaqy alsa, kompanıa basshysy 72 myń frank alady degen sóz emes. Basshylyq pen jumysshynyń alatyn aılyǵy ádiletti bólingen. "Qazpochta" operatorynyń jalaqysy 50 myń teńgeni qurasa, kompanıany dırektory ári ketkende 600 myń teńge aılyq alýy kerek", – deıdi qarjyger.
Aılyqtaǵy ádiletsizdik "Qazpochta" ǵana emes, ózge de ulttyq kompanıalardyń ádetine enip ketken.
"Mundaı mekemede isteıtin qyzmetker 200 myń teńgeniń tóńireginde aılyq alady, al bastyǵynyń jalaqysy - 5-6 mln teńgeni quraıdy, buǵan 12 aıda bir túsetin jyldyq bonýsty qosyńyz", – deıdi Rasul Rysmambetov.
