قارجىگەر بىزدەگى باسشىلىق پەن قاتارداعى جۇمىسشىنىڭ الاتىن ايلىعى جەر مەن كوكتەي دەيدى.
"قاتەلەسپەسەم قازپوچتانىڭ ورتالىق اپپاراتىندا ىستەيتىن دوكەي ديرەكتوردىڭ شوتىنا اي سايىن 1،2 ملن تەڭگە اۋدارىلادى. ءدال وسى مەكەمەدە ىستەيتىن قاراپايىم وپەراتور تەرلەپ-تەپشىپ ءجۇرىپ ايىنا 47 690 تەڭگە الادى ەكەن ("قازپوچتاداعى" ەڭ تومەنگى ايلىق). دوڭگەلەكتەر بولساق ديرەكتور وپەراتورعا قاراعاندا 24 ەسە كوپ تابادى"، – دەيدى رىسمامبەتوۆ.
ونىڭ ايتۋىنشا شۆەيساريا سەكىلدى دامىعان ەلدەردە باسشىنىڭ قاراماعىنداعى قىزمەتكەردەن بالەنبەي ەسە اسىرىپ ايلىق الۋىنا جول بەرىلمەيدى.
"بۇل ەلدە دە قازپوچتاعا ۇقساس ۇيىم بار. ءبىراق جالاقى كەلگەندە ءدال بىزدەگىدەي الشاقتىق جوق. پوچتا باسشىسىنىڭ تابىسى قىزمەتكەردىڭ ايلىعىنان 12 ەسە اسىپ كەتسە ارتىنان ءسوز ەرەدى، سىنعا ۇشىرايدى.
ءبىزدىڭ تۇسىنىككە سالساق شۆەيساريا تەمىرجولىندا ىستەيتىن جولسەرىك ايىنا 6-8 مىڭ فرانك جالاقى السا، كومپانيا باسشىسى 72 مىڭ فرانك الادى دەگەن ءسوز ەمەس. باسشىلىق پەن جۇمىسشىنىڭ الاتىن ايلىعى ادىلەتتى بولىنگەن. "قازپوچتا" وپەراتورىنىڭ جالاقىسى 50 مىڭ تەڭگەنى قۇراسا، كومپانيانى ديرەكتورى ءارى كەتكەندە 600 مىڭ تەڭگە ايلىق الۋى كەرەك"، – دەيدى قارجىگەر.
ايلىقتاعى ادىلەتسىزدىك "قازپوچتا" عانا ەمەس، وزگە دە ۇلتتىق كومپانيالاردىڭ ادەتىنە ەنىپ كەتكەن.
"مۇنداي مەكەمەدە ىستەيتىن قىزمەتكەر 200 مىڭ تەڭگەنىڭ توڭىرەگىندە ايلىق الادى، ال باستىعىنىڭ جالاقىسى - 5-6 ملن تەڭگەنى قۇرايدى، بۇعان 12 ايدا ءبىر تۇسەتىن جىلدىق بونۋستى قوسىڭىز"، – دەيدى راسۇل رىسمامبەتوۆ.
