Veb keńistikte muny DDoS shabýyl deidi. Bútin bir eldiń ǵalamtor keńistigine zaqym keltirýde kózdeitin qasqóiler belgili bir internet resýrsqa nemese salalyq portalǵa joiqyn trafikti «tóge salady».
Sonyń saldarynan ǵalamtorǵa kirý qiyndap, jeli múlde isten shyǵady. Internet servisterdiń qyzmeti baiaýlaidy.
Buǵan tótep berý úshin osydan biraz buryn Úkimet «Kiberqalqan» júiesin ázirlegen. Eldiń internet keńistigin kúzetetin osynaý keshenniń jumysyn «Memlekettik tehnikalyq qyzmet» agenttigi qadaǵalaidy.
Jelilik trafikti udaiy súzgiden ótkizip, kúdikti kontenttiń jolyn bógeitin agenttik mamandary kibershabýylǵa qarsy kúndiz-túni kóz ilmei kúresedi.
«Kiberqalqan» kesheniniń kómegimen ishki jáne syrttan keletin trafik muqiiat tekserilip, qaýipti baǵdarlamalar buǵattalyp otyrady.
Sózimizge dálel, ótken aida (5 qyrkúiek pen 5 qazan aralyǵy, red) keshenniń kógimen 20 mln-ǵa jýyq kibershabýyldyń beti qaitarylǵan. «Memlekettik tehnikalyq qyzmet» agenttigi mamandarynyń atap ótkenindei mundai arandatýlardyń sany sailaý qarsańyndy kúrt ósipti.
«Qaznetti isten shyǵarýdy kózdeitin mundai shabýyldardyń tasasynda eldiń irgesin sógiltýdi kózdeitin pasyq piǵyldy toptardyń turǵany anyq. DDoS shabýyldardyń túpki maqsaty da osy. Álgindei toptardyń artynda bottardan quralǵan myń san ásker bar. «Kiberqalqan» kesheniniń kómegimen osy kúnge deiin milliondaǵan hakerlik shabýyldyń joly kesildi», – deidi Dalanews-ke pikir bildirgen IT maman Baqyt Júsipov.
«Memlekettik tehnikalyq qyzmettiń» málim etkenindei mundai shabýyldar sailaý qarsańynda búgingiden beter údei túsýi múmkin.
Aita ketelik, prezident Toqaev elimizdiń kiberqaýipsizdigin kúsheitý máselesine birneshe márte toqtalyp, Smaiylov úkimetine tiisti tapsyrma bergen edi.
Syrttan tónetin qaýip-qaterdi sóz etken Memleket basshysy:
«Hakerlik shabýyldardyń basty maqsaty el ishinde dúrbeleń ornatý. Syrtqy kúshterdiń jymysqy josparyn júzege asyrýǵa jol bermeimiz. Kiberqaýipsizdikti kúsheitýge basymdyq beriledi» degen edi.
