Sonymen, «Jarqyn bolashaq» áleýmettik jobasy aiasynda Jańaózendegi daryndy oqýshylardyń elimizdiń úzdik mektep-internattary men kolledjderinde oqýyna qoldaý kórsetiledi. Mańyzdy shara osy jyldan bastalady. Munan soń ár jyl saiyn 1000-ǵa jýyq jańaózendik jas naqty ǵylymdardy tereńdetip oqýǵa múmkindik alsa, bir jaǵynan shyǵarmashylyq jáne sporttaǵy darynyn damytady.
Uiymdastyrýshylardyń aitýynsha, oqýshylar túrli baǵyttar boiynsha suranysqa ie mamandyqtardy tańdaidy. Negizi bul joba jospar boiynsha 2025 jylǵa deiin jalǵasady. Boljamǵa sáikes, osy kezeń ishinde 4 myńdai oqýshy bilimderin jetildiredi.
«Jarqyn bolashaq» jobasynyń maqsaty – sapaly bilim alýǵa qoljetimdilikti qamtamasyz etý, oqýshylardyń bilim sapasyn, sondai-aq olardyń eńbek naryǵynda básekege qabilettiligin arttyrý. Naqtylai tússek, joba osy jyly 2 baǵyt: oqýshylardyń akademiialyq utqyrlyǵy jáne kolledjderdegi suranysqa ie mamandyqtar negizinde iske qosylady.
Jańaózendik oqýshylar Qazaqstannyń túrli óńirindegi mektep-internattar men tehnikalyq jáne kásiptik bilim berý mekemelerin (kolledjder) tańdap, irikteýden óte alady. Bilim berý mekemeleriniń arasynda Aqmola oblysyndaǵy daryndy balalarǵa arnalǵan IQanat High School of Burabay mektep-pansionaty, QR iri qalalaryndaǵy fizika-matematika baǵytyndaǵy joǵary bilikti mektep-internattar, sport baǵytyndaǵy mektepter (olimpiadalyq rezerv mektepteri), QR iri qalalaryndaǵy «Jas maman» baǵdarlamasy boiynsha jańǵyrtylǵan kolledjder, óner salasyndaǵy kolledjder jáne áskeri mektepter jáne «Jas ulan» kolledjderi bar.
Mektep-internattarǵa qabyldaý jáne kolledjderge túsý jasy oqý oryndarynyń ishki erejelerimen retteledi.
Atalmysh jobaǵa qatysatyn mektepter men kolledjderdiń tizimi aldaǵy ýaqytta keńeitiletin bolady. Buǵan qosa baǵdarlama sheńberinde kolledj túlekterin óńirlerde jumysqa ornalastyrýdy qamtamasyz etý kún tártibinde tur.
