سونىمەن، «جارقىن بولاشاق» الەۋمەتتىك جوباسى اياسىندا جاڭاوزەندەگى دارىندى وقۋشىلاردىڭ ەلىمىزدىڭ ۇزدىك مەكتەپ-ينتەرناتتارى مەن كوللەدجدەرىندە وقۋىنا قولداۋ كورسەتىلەدى. ماڭىزدى شارا وسى جىلدان باستالادى. مۇنان سوڭ ءار جىل سايىن 1000-عا جۋىق جاڭاوزەندىك جاس ناقتى عىلىمداردى تەرەڭدەتىپ وقۋعا مۇمكىندىك السا، ءبىر جاعىنان شىعارماشىلىق جانە سپورتتاعى دارىنىن دامىتادى.
ۇيىمداستىرۋشىلاردىڭ ايتۋىنشا، وقۋشىلار ءتۇرلى باعىتتار بويىنشا سۇرانىسقا يە ماماندىقتاردى تاڭدايدى. نەگىزى بۇل جوبا جوسپار بويىنشا 2025 جىلعا دەيىن جالعاسادى. بولجامعا سايكەس، وسى كەزەڭ ىشىندە 4 مىڭداي وقۋشى بىلىمدەرىن جەتىلدىرەدى.
«جارقىن بولاشاق» جوباسىنىڭ ماقساتى – ساپالى ءبىلىم الۋعا قولجەتىمدىلىكتى قامتاماسىز ەتۋ، وقۋشىلاردىڭ ءبىلىم ساپاسىن، سونداي-اق ولاردىڭ ەڭبەك نارىعىندا باسەكەگە قابىلەتتىلىگىن ارتتىرۋ. ناقتىلاي تۇسسەك، جوبا وسى جىلى 2 باعىت: وقۋشىلاردىڭ اكادەميالىق ۇتقىرلىعى جانە كوللەدجدەردەگى سۇرانىسقا يە ماماندىقتار نەگىزىندە ىسكە قوسىلادى.
بۇل رەتتە رەسپۋبليكالىق مامانداندىرىلعان مەكتەپ-ينتەرناتتاردا وقۋ ءۇشىن مەملەكەتتىك كۆوتالار ءبولۋ قاراستىرىلىپ جاتىر. ال وسى مەكتەپ-ينتەرناتتاردا جانە كوللەدجدەردە اقىلى نەگىزدە وقۋ «قازمۇنايگاز» ۇلتتىق كومپانياسى ەسەبىنەن جۇرگىزىلەدى. وقۋشىلاردىڭ وقۋ اقىسىمەن قوسا، تۇراتىن ورنى، جولاقىسى جانە باسقا دا شىعىندارى وتەلەدى.
جاڭاوزەندىك وقۋشىلار قازاقستاننىڭ ءتۇرلى وڭىرىندەگى مەكتەپ-ينتەرناتتار مەن تەحنيكالىق جانە كاسىپتىك ءبىلىم بەرۋ مەكەمەلەرىن (كوللەدجدەر) تاڭداپ، ىرىكتەۋدەن وتە الادى. ءبىلىم بەرۋ مەكەمەلەرىنىڭ اراسىندا اقمولا وبلىسىنداعى دارىندى بالالارعا ارنالعان IQanat High School of Burabay مەكتەپ-پانسيوناتى، ق ر ءىرى قالالارىنداعى فيزيكا-ماتەماتيكا باعىتىنداعى جوعارى بىلىكتى مەكتەپ-ينتەرناتتار، سپورت باعىتىنداعى مەكتەپتەر (وليمپيادالىق رەزەرۆ مەكتەپتەرى)، ق ر ءىرى قالالارىنداعى «جاس مامان» باعدارلاماسى بويىنشا جاڭعىرتىلعان كوللەدجدەر، ونەر سالاسىنداعى كوللەدجدەر جانە اسكەري مەكتەپتەر جانە «جاس ۇلان» كوللەدجدەرى بار.
مەكتەپ-ينتەرناتتارعا قابىلداۋ جانە كوللەدجدەرگە ءتۇسۋ جاسى وقۋ ورىندارىنىڭ ىشكى ەرەجەلەرىمەن رەتتەلەدى.
بۇل رەتتە وقۋ ورىندارىنىڭ ساپالى بولۋىنا باسىمدىق بەرىلىپ وتىر. ماسەلەن، ءبىلىم بەرۋ جۇيەسى، ونىڭ ىشىندە جايلى جاتاقحانا، تاماقتانۋ وبەكتىلەرى، مەديسينالىق قىزمەت، بىلىكتى پسيحولوگيالىق-پەداگوگيكالىق جانە باسقا دا قىزمەتتەر تالاپقا ساي بولۋى ءتيىس.
«جارقىن بولاشاق» باعدارلاماسىنا سەرىكتەس مەكتەپتەر مەن كوللەدجدەردىڭ ارنايى كوميسسيالارى جاڭاوزەندەگى بالالار اراسىنان الدىن الا ىرىكتەۋ جۇمىستارىن جۇرگىزەدى. سونداي-اق مەكتەپ وقۋشىلارى مەن ولاردىڭ اتا-انالارىن وقۋ باعدارلامالارىمەن تانىستىرۋ ماقساتىندا ءبىلىم بەرۋ مەكەمەلەرىنىڭ جارمەڭكەلەرى وتكىزىلمەك.
اتالمىش جوباعا قاتىساتىن مەكتەپتەر مەن كوللەدجدەردىڭ ءتىزىمى الداعى ۋاقىتتا كەڭەيتىلەتىن بولادى. بۇعان قوسا باعدارلاما شەڭبەرىندە كوللەدج تۇلەكتەرىن وڭىرلەردە جۇمىسقا ورنالاستىرۋدى قامتاماسىز ەتۋ كۇن تارتىبىندە تۇر.
