«Qazkommertsbanktyń» Tair Qaldybaevtyń qazasy jaily málimdemesi
Onyń mezgilsiz qazasy ony tanyǵan adamdar úshin árine aýyr soqqy boldy. Sońǵy kúnderi bank pen kásipker arasyndaǵy qarama-qaishylyqtarǵa qaramastan, tanymal qoǵam ókilderiniń aralasýymen bul jaǵdaidyń sheshimi de oń qarastyrylǵan edi.
Tair Qaldybaev jýrnalist Gýzial Baidalinova ekeýi «Qazkommertsbank» AQ-nyń bedeline nuqsan keltiretin kópe-kórneý jalǵan aqparatty júieli túrde taratqany úshin qamaýǵa alynǵan bolatyn. Olardyń bul isi, iaǵni jalǵan maqalalardy Nakanune.kz internet-portaly arqyly taratyp, banktiń bedeline aitarlyqtai nuqsan keltirilgeni sotta dáleldengen. Quqyqtyq memlekette osy materialdardy taratqan uiymdastyrýshylardy sot aldynda jaýapkershilikke tartýdan basqa qorǵanystyń ózge túri joq ekenin atap aitqymyz keledi.
Alaida, sot úkimi shyqqan soń qoǵam qairatkeri Denis Krivosheevtiń qatysýymen bank jáne onyń bas aktsioneri Keńes Rakishev adamgershilik, qaiyrymdylyq printsipterin negizge ala otyryp, bitimgershilik kelisimge kelip, Gýzial Baidalinovaǵa qatysty shyǵarylǵan sot úkimin jeńildetý týraly ótinim bergen edi. Erterekte «Qazkommertsbank» osy azamattyq is boiynsha, óz kinásin jartylai moiyndaǵany úshin somasy 19 million 900 myń teńgeni quraityn shaǵymnan bas tartyp, 100 myń teńgeni quraityn simvolikalyq ótemaqyny qabyl alǵan.
Bitimgershilik protsestiń barlyq qatysýshylary Gýzial Baidalinovanyń, sondai-aq Tair Qaldybaevtyń qylmystyq isi aiasyndaǵy jazasyn jeńildetý boiynsha sońǵy sheshimdi sot 5 shildede qabyldaidy dep úmittengen bolatyn. Alaida, sottyń otyrysy bir aptaǵa, iaǵni 12 shildege shegerilgen. Sot jýrnalistke qatysty jaǵdaidy jeńildetip, al qylmystyq iske tapsyrys bergen Tair Qaldybaevtyń apelliatsiiasyn ózgerissiz qaldyrsa, bank qoǵam qairatkerlerimen kelgen kelisimge sáikes, Tair Qaldybaevqa qatysty sot úkimin jeńildetý týraly jáne bitimgershilik kelisimge kelý protsesin sol mezgilde tikelei óz tarapynan bastaidy dep josparlanǵan edi. Óitkeni, ol óz kinásin moiyndap, bankke materialdyq zalal keltirgeni úshin 144 million 235 myń teńge kóleminde somany ótegen. Ekinshiden, jaqynda ǵana onyń aýyr syrqaty jóninde jáne qyzdarynyń biri qatty aýyratyny jaily belgili bolǵan.
Gýzial Baidalinovaǵa jáne Tair Qaldybaevqa banktiń bul jaǵdaidy bitimgershilikpen sheshetini jaily da belgili edi. Alaida, bul kúnderi jan túrshigerlik oqiǵa oryn aldy, Tair Qaldybaev mezgilsiz qaza boldy. Sol sebepti, taraptardyń bitim jasaý áreketine ózgerister engizildi. Biz, «Kazkommertsbank» AQ, Keńes Raqyshev jáne qoǵam qairatkerleri Tair Qaldybaevtyń materialdyq shyǵyndy ótegen 144 million 235 myń teńgeni onyń otbasyna berý jónindegi birikken sheshimimizdi jariialaimyz. Bulai bolady dep eshkim oilaǵan emes. Biz, Tair Qaldybaevtyń mezgilsiz qazasyna bailanysty onyń otbasyna, týǵan-týystary men tanystaryna shyn nietten kóńil bildiremiz. Jatqan jeri jaily, topyraǵy torqa bolsyn!
«Kazkommertsbank» AQ
