Eń aldymen óńir basshysy mal bordaqylaýmen jáne et ónimderin óndiretin «Qarqyn – 2030» JShS-niń jumysymen tanysty. 2009 jyly qurylǵan seriktestiktiń menshiginde 250 gektar jer bar. 800 bas mal bordaqylaýǵa shaqtalǵan nysanda búginde 400 bas iri qara bailanýda. Tsehta táýligine 5 tonna 12 túrli shujyq óndiriledi. Daiyn ónim elimizden bólek, Reseige de jóneltilgen. Onda 35 adam turaqty jumyspen qamtylsa, 50 adam maýsymdyq jumyspen ainalysady. Ótken jyly seriktestik 2 mlrd. 955 mln. teńgeniń ónimin óndirgen. Sonyń esebinen 167 mln. 218 myń teńge salyq túsken.
Seriktestiktiń jumysyna qanyqqan oblys ákimi osy jyldyń bes aiynda óńir boiynsha 90 myń tonnadan astam et óndirilgenin aityp, onyń ishinde 8 myń tonnaǵa jýyǵy Qazyǵurt aýdanyna tiesili ekenin jetkizdi. Bul mal sharýashylyǵyn damytýǵa qolaily aimaq úshin az kórsetkish ekenin tilge tiek etip, osy baǵyttaǵy jumystardy damytýdy aýdan basshysyna tapsyrdy.
Budan bólek, aimaq basshysy Qyzylqiia aýyldyq okrýgindegi dándi-daqyl men jemis-jidek óndirýmen ainalysatyn «Amankeldi» JShS-ne bardy. Seriktestik búginde 2322 gektar jerdi baptap, paidaǵa asyryp otyr. Munda 250 adam turaqty jumyspen qamtylǵan. Qojalyq 2005 jyly arnaiy tuqym sharýashylyǵy mártebesine ie bolǵan.
