ەڭ الدىمەن ءوڭىر باسشىسى مال بورداقىلاۋمەن جانە ەت ونىمدەرىن وندىرەتىن «قارقىن – 2030» ءجشس-نىڭ جۇمىسىمەن تانىستى. 2009 جىلى قۇرىلعان سەرىكتەستىكتىڭ مەنشىگىندە 250 گەكتار جەر بار. 800 باس مال بورداقىلاۋعا شاقتالعان نىساندا بۇگىندە 400 باس ءىرى قارا بايلانۋدا. سەحتا تاۋلىگىنە 5 توننا 12 ءتۇرلى شۇجىق وندىرىلەدى. دايىن ءونىم ەلىمىزدەن بولەك، رەسەيگە دە جونەلتىلگەن. وندا 35 ادام تۇراقتى جۇمىسپەن قامتىلسا، 50 ادام ماۋسىمدىق جۇمىسپەن اينالىسادى. وتكەن جىلى سەرىكتەستىك 2 ملرد. 955 ملن. تەڭگەنىڭ ءونىمىن وندىرگەن. سونىڭ ەسەبىنەن 167 ملن. 218 مىڭ تەڭگە سالىق تۇسكەن.
سەرىكتەستىكتىڭ جۇمىسىنا قانىققان وبلىس اكىمى وسى جىلدىڭ بەس ايىندا ءوڭىر بويىنشا 90 مىڭ توننادان استام ەت وندىرىلگەنىن ايتىپ، ونىڭ ىشىندە 8 مىڭ تونناعا جۋىعى قازىعۇرت اۋدانىنا تيەسىلى ەكەنىن جەتكىزدى. بۇل مال شارۋاشىلىعىن دامىتۋعا قولايلى ايماق ءۇشىن از كورسەتكىش ەكەنىن تىلگە تيەك ەتىپ، وسى باعىتتاعى جۇمىستاردى دامىتۋدى اۋدان باسشىسىنا تاپسىردى.
بۇدان بولەك، ايماق باسشىسى قىزىلقيا اۋىلدىق وكرۋگىندەگى ءداندى-داقىل مەن جەمىس-جيدەك وندىرۋمەن اينالىساتىن «امانكەلدى» جشس-نە باردى. سەرىكتەستىك بۇگىندە 2322 گەكتار جەردى باپتاپ، پايداعا اسىرىپ وتىر. مۇندا 250 ادام تۇراقتى جۇمىسپەن قامتىلعان. قوجالىق 2005 جىلى ارنايى تۇقىم شارۋاشىلىعى مارتەبەسىنە يە بولعان.
شارۋاشىلىقتىڭ جۇمىسىمەن تانىستىرعان كاسىپكەر تامشىلاتىپ سۋارۋ ءادىسىنىڭ ارقاسىندا شىعىن ازايىپ، ءونىم كولەمى ارتقانىن ايتادى. ماسەلەن، الما، شابدالى، شيە، الحورى، ورىك، المۇرت، ءجۇزىم ونىمدەرىنەن 2017 جىلى 14 ملن. تەڭگە تابىس تاپقان.
بۇدان سوڭ اكىم «ىبرايىم قاجى» شارۋا قوجالىعىنا ايالدادى. مال ازىعىن دايارلاۋمەن اينالىساتىن قوجالىقتىڭ مەنشىگىندە 0،25 گەكتار جەر بار. مۇندا تاۋلىگىنە 2 توننا كوك بالاۋسا (گيدروپون) وندىرىلەدى.
ساپارى سوڭىندا ب ا ق وكىلدەرىنە بەرگەن سۇقباتىندا وبلىس اكىمى اۋداندا ەگىن جانە مال شارۋاشىلىعى دامىعانىن ايتىپ، بۇگىندە اۋداندا قارقىندى باۋ كولەمى ارتىپ كەلە جاتقانىنا جانە حالىققا قاجەتتى كوممۋنالدىق ماسەلەلەردە شەشىم تاۋىپ كەلە جاتقانىنا توقتالدى.
– قازىعۇرت اۋدانىندا جالپى قارقىندى باۋ كولەمى 242 گەكتار بولسا، بيىلدىڭ وزىندە 80 گەكتار جەرگە ەگىلدى. جىلىجايلاردىڭ ءوزى ءبىر اۋداندا 117 گەكتار، ال بيىل 30 گەكتار قوسىلىپ وتىر. ال اۋدانداعى 28 مىڭ گەكتار جەرگە ەگىلگەن بيداي مەن ارپانىڭ ورتاشا تۇسىمدىلىگى گەكتارىنا 23-25 سەنتنەردى قۇرايدى دەپ كۇتىلۋدە. بۇل دا اۋداننىڭ قازىرگى جاعدايىنىڭ جاقسارعاندىعىن اڭعارتادى. بۇدان بولەك، اۋدانداعى 8 ەلدى مەكەندە گازداندىرۋ جۇمىستارى جۇرگىزىلۋدە. ياعني، قازىعۇرتتىق 1800 وتباسى بيىل كوگىلدىر وتىنعا قول جەتكىزبەك. گازداندىرۋدى الداعى جىلدارى 95 پايىزعا جەتكىزۋ جوسپارلانۋدا. ول ءۇشىن ءتيىستى جۇمىستار جاسالۋدا. سۋ ماسەلەسىندە دە قازىعۇرت الدىڭعى قاتاردا، جالپى اۋىز سۋمەن قامتاماسىز ەتۋ 88 پايىزدى قۇرايدى. وسى جىلدىڭ وزىندە 9 ەلدى مەكەندى تازا اۋىز سۋمەن قامتۋ جۇمىستارى قولعا الىندى. وسىنداي حالىققا قاجەتتى جول، سۋ، گاز ماسەلەلەردىڭ بارلىعى اۋداندا ءتيىستى دەڭگەيدە شەشىلىپ كەلەدى، – دەدى ج.تۇيمەبايەۆ.
تۇركىستان وبلىسى اكىمىنىڭ باسپا ءسوز قىزمەتى
