Búgin Qazyǵurt aýdanynda 25 qazan – Respýblika kúnine orai jazýshy, dramatýrg, memleket jáne qoǵam qairatkeri, «Qurmet belgisi» ordeniniń iegeri, aýdannyń Qurmetti azamaty bolǵan Qalaýbek Tursynqulovtyń 90 jyldyǵyna arnalǵan «Qazyǵurt bereke, birlik bastaýy» atty respýblikalyq aqyndar aitysy ótti.
Jyr saiysyna respýblikanyń ár óńirinen kelgen ot aýyzdy, oraq tildi 10 aqyn qatysty. Olar aitys óneri arqyly elimizdiń egemendigi men táýelsizdik jyldaryndaǵy jetistikterin, ulttar men ulystardyń myzǵymas tatýlyǵy men dostyǵyn, qazaq halqynyń salt-dástúri men ádet-ǵurpyn, túrlengen, gúldengen Túrkistandy jáne kieli Qazyǵurt óńirin jyrǵa qosyp keńinen nasihattady.
Bul sóz báigesine aitysker aqyn, sazger, jýrnalist Bekjan Áshirbaev, aqyn, QR Mádeniet salasynyń úzdigi, «Qazyq jurt» jyr jinaǵynyń avtory, aitys aqyndary men jyrshy-termeshilerdiń Halyqaralyq Odaǵynyń múshesi Bekmurat Anarbaev, aqyn, dástúrli ánshi-termeshi, QR Mádeniet salasynyń úzdigi Aiazbek Rýstamov, Qazaqstan Jýrnalister odaǵynyń, Qazyǵurt aýdandyq qoǵamdyq keńestiń múshesi, aýdannyń qurmetti azamaty Raiymbek Aitýbai qazylyq etti.
Alaman aitysqa aýdan ákimi Azizhan Ismailov arnaiy qatyty. Barsha qonaqtar men kórermenderdi, aqyndardy mereili merekemen quttyqtady. Sondai-aq, aitys óneriniń dárejesi biik, teńdessiz talantty talap etetinin sózge tiek etip, aqyndarǵa sáttilik tiledi.
Qazylar alqasynyń sheshimimen Qaraǵandy oblysynan kelgen Maqsat Ahanov bas júldeni iemdense, júldeli I oryn Túrkistan qalasynan kelgen Bekarys Shoibekovke buiyrdy. Júldeli II oryndy Almaty oblysynyń aqyny Aiym Amirhanova, III oryndy Astana qalasynan Iran-ǵaiyp Kúzembaev,
Qyzylorda oblysynan Nurmat Mansur jáne Almaty qalasynan Nurzat Qarý enshiledi. Al Túrkistan oblysynan kelgen Nurlybek Meiirmanov, Nurmahan Jaqypbek, Shymkent qalasynan Meiirjan Jarylqap jáne Qazyǵurt aýdanynyń aqyny Erasyl Jaqsybek aýdan ákiminiń jáne basqa da arnaiy júldelermen marapattaldy.
Túrkistan oblysy mádeniet basqarmasynyń baspasóz qyzmeti
