Túrkistan oblysyndaǵy barlyq aýdan-qalalarda 17 «Otbasyn qoldaý ortalyǵy» jumys isteidi. Búgin Qazyǵurt aýdanynda memlekettik otbasylyq saiasatty júieli júrgizýge baǵyttalǵan áleýmettik nysandar qatary taǵy bir jańa ǵimaratpen tolyqty, - dep habarlaidy Dalanews.kz
Elimizdiń barlyq óńirlerinde otbasyn qoldaý ortalyqtaryn qurý jóninde Prezident Jarlyǵymen bekitilgen «QR 2030 jylǵa deiingi otbasylyq jáne genderlik saiasat» tujyrymdamasyna sáikes, Qazyǵurt aýylynda aýdandyq «Jumyspen qamtý jáne áleýmettik baǵdarlamalar bólimi» memlekettik mekemesiniń «Otbasyn qoldaý ortalyǵy» ashyldy.
Atalǵan kommýnaldyq memlekettik mekeme biylǵy jyldyń qańtar aiynda tirkeýden ótip, ortalyqta 14 shtattyq birlik bekitilgen. Eki qabatty ǵimaratta ornalasqan mekemede qazirgi tańda 2 bólmeden turatyn 14 jatyn oryn (onyń ishinde balalarǵa arnalǵan 8 jatyn oryn), 6 jumys bólmesi, 2 azamattardy qabyldaý orny bar.
Jańa áleýmettik nysannyń ashylý rásiminde aýdan ákimi Azizhan Ismailov mekeme jumysynyń mańyzdylyǵyna toqtalyp, ortalyq qyzmetkerleri turǵyndardyń túrli áleýmettik máselelerin sheshýge kómektesip, otbasy institýtyn damytýǵa qoldaý kórsetetinine senim bildirdi.
Bul ortalyq – otbasy institýtyn qoldaý maqsatynda ómirlik qiyn jaǵdaiǵa tap bolǵan jáne turmystyq zorlyq-zombylyqqa ushyraǵan otbasylarǵa psihologiialyq, quqyqtyq jáne áleýmettik keńester berip, 9 baǵyt boiynsha konsýltatsiialyq qyzmetter kórsetedi.
