Búgingi tańda «Qazyǵurt» ındýstrıaldyq aımaǵynyń jalpy aýmaǵy – 13 gektar. Onda 1,9 mlrd. teńgeni quraıtyn 7 jobaǵa jer telimi berilgen. 2016-2017 jyldary 3 joba iske asyrylsa, 2018 jyly 589 mln. teńgelik tabıǵı shyryn sýsyn óndiretin «Kórik SHQ» JSHS-i jumysyn bastady.
Al 3 jobany 2019 jyly iske qosý josparlanǵan. Bul týraly Túrkistan oblysynyń Óńirlik komýnıkasıalar qyzmetinde ótken brıfıńte Qazyǵurt aýdanynyń ákimi Tólegen Telǵaraev málimdedi.
Aýdan basshysynyń aıtýynsha, aldaǵy jyly ındýstrıaldy aımaqta iske qosylatyn jobalardyń arasynda jalpy quny 602,7 mln. teńgeni quraıtyn qurǵaq sút jáne sary maı óndiretin «Asyl bastaý KZ» JSHS-i, quny 125 mln. teńgelik «Aq-nıet 5» ÓK-niń «Temir beton ónimderi» jobasy jáne quny 112,7 mln. teńge quraıtyn «KN eksport 777» JSHS-ń «Jıhaz shyǵarý» jobasy bar.
«Qazyǵurt aýdanynda kásipkerlik salasy turaqty túrde damýda. Damýdyń jarqyn kórinisi retinde «Óńirler kásipkerligin qoldaý» baǵdarlamasynan tys jalpy quny 135 mln. teńgelik 2 joba iske qosylǵanyn aıtýǵa bolady. Olar: «Qazyǵurt aına» JSHS-nyń suıyq shyny óndirisi – 85 mln. teńge, «UNIFRUTTI GOLD» JSHS-nyń jemister men kókónisterdi óńdeý arqyly dıetalyq púreler shyǵarý óndirisi – 50 mln. teńge.
Ónerkásip salasyndaǵy jetistikter jyl basynda josparlanǵan nátıjege saı oryndalýda. Aýdan kóleminde búgingi tańda jumys istep turǵan 18 kásiporyn bar. Aǵymdaǵy jyldyń 10 aıynda óńirdegi ónerkásip kásiporyndarynda 5 mlrd. 633 mln. teńgeniń ónimi óndirilip, ótken jyldyń tıisti kezeńimen salystyrǵanda naqty kólem ındeksi 103,9 paıyzdy qurady», – dedi Tólegen Turtaıuly.
Qazyǵurt aýdanynda qazirgi tańda 94 shaǵyn joba iske qosylyp, 405 adam turaqty jumyspen qamtylǵan. Budan ózge, shaǵyn jáne orta kásipkerler sany 8226-ǵa jetip, 114,6 paıyzǵa ósti.
Shaǵyn jáne orta kásipkerlik salasyn damytý maqsatynda qarjy uıymdarynan 2018 jyldyń 10 aıynda 4565 tulǵaǵa 2414,8 mln. teńge nesıe berildi. Negizgi basym baǵyty – aýyl sharýashylyq salasy boıynsha.
