Qazbilim mektebiniń muǵalimderi ailap jalaqysyn ala almai júrgeni týraly aqparat tarady. Biri jaldamaly páterde, biri nesiege belshesinen batyp otyr. Jumys isteidi, kúnde bala oqytady, biraq ai sońynda "aqsha joq" degen syltaýmen qur ýáde alady, dep habarlaidy Dalanews.kz Nege.kz portalyna siltep.
"Bul mekteptiń basshysy – Aiatjan Ahmetjan. Ol kináni birese ministrlikke, birese qarjy ortalyǵyna aýdaryp júr. Biraq ata-anadan aqshany kim jinady? Muǵalimmen kelisimshartty kim jasady? Búkil ujym ailap aqshasyz otyrǵanda, basshylyq "men kináli emespin" dep jaibaraqat otyra ma? Oqý ornynyń basshysy muǵalimniń jalaqysyn tóleýdiń ornyna, "sottasamyn" dep ustazdardy qorqytatyn kórinedi", - dep jazylǵan basylym málimetinde.
Shymkent qalasynyń Qazbilim ortalyǵynyń muǵalimideri ashynyp otyr. Olar "Aiatjan Ahmetjan jalaqymyzdy tólemegenimen qoimai, óziniń qandai basshy ekenin kórsetti" deidi. Muǵalimder eńbekaqysyn ala almai, ár esikti bir qaǵyp júr.
Bul jaǵdai týraly jeli qoldanýshysy Jasulan Jaqypov bylai dep jazdy: "Qazir nesiesiz júrgen adam bar ma ózi? Ásirese, jas otbasylar úshin ómir súrý shyn máninde ońai bolmai tur. Páter aqysy, júrip-turý, azyq-túlik, jaryq pen sý, balanyń kiimi men mektebi, nesiesi bar… Ai saiyn bári jinalyp, bir jalaqyǵa qarap otyratyn jaǵdaiǵa jettik.
Endi kóz aldyńyzǵa elestetińizshi: siz úsh ai jumys istep, biraq eńbekaqyńyzdy ala almai júrsiz. Basshylyqqa aitasyz, "kútińiz" deidi. Esep-qisap, jospar joq. Sonda siz ne isteýińiz kerek? Úidegi shyǵyndy qalai jappaqsyz? Balańyzdyń kiimin she, tamaǵyn she?
Mundai jaǵdaida úndemei júre berý – qiynnyń qiyny. Biraq kóp muǵalim úndeidi dep oilaisyz ba? Joq. Olar áli de úmitin úzbei otyr. Al ún qatqandar – shydamy taýsylǵandar. Olar da adam. Olar da kún kórgisi keledi. Taǵy bir baiqaǵanym: kei kásipkerler "ultym" dep sóz bastap, upai jinaýǵa tyrysady. Biraq shyn janashyrlyqty tek sózben emes, ispen kórsetetin ýaqyt keldi. Bul – ról oinaityn emes, adal bolýdy talap etetin kezeń. Úsh ai ailyq almai kórmeiinshe, bireýdiń janaiqaiyn túsiný qiyn. Sondyqtan únsiz qalmaiyq. Jaǵdaiy nashardy túsinip, ádildik jaǵynda bolaiyq…"
Onyń jazýynsha, Qazbilim ortalyǵynyń keibir muǵalimderi áleýmettik jelide ashyq sóilei almaidy eken. Sebebi jumysqa qabyldanar kezde "teris pikir jazýǵa bolmaidy" degen pýnkti bar kelisimshartqa qol qoidyryp alatyn kórinedi. "Bul degenimiz Memleketke, Prezidentke degen, elimizdiń muǵalimderine qarsy jumys jasaý dep bilemiz" deidi.
Sondai-aq, J.Jaqypov Qazbilim ortalyǵy basshysynyń sotpen qorqytyp otyrǵanyn da habarlady.
"Aiatjan Ahmetjanuly endi men úshin ultshyl ustaz emes. Meniń kózim jetti: bul azamat memlekettiń qarjysyn alyp, jeke paidasyn kúittep otyrǵan kásipker ǵana. Ustazdarǵa jany ashityn adam emes, bedeline syn kelse, ashýǵa býlyǵyp, jeke basyma ýgroza jasaýdan taiynbaityn tulǵa…
Menimen sottasqysy keletinin aityp, jeke hatpen qorqytyp jatyr. Myna skrinshottaǵy jazbasy – sonyń aiǵaǵy. Ashyq dialogtan qashyp, jeke hatqa jasyrynyp, qysym kórsetýge kóshti", – dep jazdy ol.
Áleýmettik jelide J.Jaqypovty qoldap jazyp jatqandar az emes eken. Olardyń arasynda ortalyqtyń muǵalimderi de bar. Al J.Jaqypov "ýgroza jasady" degen Qazbilim ortalyǵynyń jetekshisi A.Ahmetjan: "Mindetti túrde sotta kezdesemiz! Qorqytý emes, azamattyq eskertý! Quqyqtyq memlekettiń azamattarymyz, bári zań júzinde sheshiledi!" – degen jazba qaldyrypty...
