Qazbilim مەكتەبىنىڭ مۇعالىمدەرى ايلاپ جالاقىسىن الا الماي جۇرگەنى تۋرالى اقپارات تارادى. ءبىرى جالدامالى پاتەردە، ءبىرى نەسيەگە بەلشەسىنەن باتىپ وتىر. جۇمىس ىستەيدى، كۇندە بالا وقىتادى، ءبىراق اي سوڭىندا "اقشا جوق" دەگەن سىلتاۋمەن قۇر ۋادە الادى، دەپ حابارلايدى Dalanews.kz Nege.kz پورتالىنا سىلتەپ.
"بۇل مەكتەپتىڭ باسشىسى – اياتجان احمەتجان. ول كىنانى بىرەسە مينيسترلىككە، بىرەسە قارجى ورتالىعىنا اۋدارىپ ءجۇر. ءبىراق اتا-انادان اقشانى كىم جينادى؟ مۇعالىممەن كەلىسىمشارتتى كىم جاسادى؟ بۇكىل ۇجىم ايلاپ اقشاسىز وتىرعاندا، باسشىلىق "مەن كىنالى ەمەسپىن" دەپ جايباراقات وتىرا ما؟ وقۋ ورنىنىڭ باسشىسى ءمۇعالىمنىڭ جالاقىسىن تولەۋدىڭ ورنىنا، "سوتتاسامىن" دەپ ۇستازداردى قورقىتاتىن كورىنەدى"، - دەپ جازىلعان باسىلىم مالىمەتىندە.
شىمكەنت قالاسىنىڭ Qazbilim ورتالىعىنىڭ مۇعالىمىدەرى اشىنىپ وتىر. ولار "اياتجان احمەتجان جالاقىمىزدى تولەمەگەنىمەن قويماي، ءوزىنىڭ قانداي باسشى ەكەنىن كورسەتتى" دەيدى. مۇعالىمدەر ەڭبەكاقىسىن الا الماي، ءار ەسىكتى ءبىر قاعىپ ءجۇر.
بۇل جاعداي تۋرالى جەلى قولدانۋشىسى جاسۇلان جاقىپوۆ بىلاي دەپ جازدى: "ءقازىر نەسيەسىز جۇرگەن ادام بار ما ءوزى؟ اسىرەسە، جاس وتباسىلار ءۇشىن ءومىر ءسۇرۋ شىن مانىندە وڭاي بولماي تۇر. پاتەر اقىسى، ءجۇرىپ-تۇرۋ، ازىق-تۇلىك، جارىق پەن سۋ، بالانىڭ كيىمى مەن مەكتەبى، نەسيەسى بار… اي سايىن ءبارى جينالىپ، ءبىر جالاقىعا قاراپ وتىراتىن جاعدايعا جەتتىك.
ەندى كوز الدىڭىزعا ەلەستەتىڭىزشى: ءسىز ءۇش اي جۇمىس ىستەپ، ءبىراق ەڭبەكاقىڭىزدى الا الماي ءجۇرسىز. باسشىلىققا ايتاسىز، "كۇتىڭىز" دەيدى. ەسەپ-قيساپ، جوسپار جوق. سوندا ءسىز نە ىستەۋىڭىز كەرەك؟ ۇيدەگى شىعىندى قالاي جاپپاقسىز؟ بالاڭىزدىڭ كيىمىن شە، تاماعىن شە؟
مۇنداي جاعدايدا ۇندەمەي جۇرە بەرۋ – قيىننىڭ قيىنى. ءبىراق كوپ ءمۇعالىم ۇندەيدى دەپ ويلايسىز با؟ جوق. ولار ءالى دە ءۇمىتىن ۇزبەي وتىر. ال ءۇن قاتقاندار – شىدامى تاۋسىلعاندار. ولار دا ادام. ولار دا كۇن كورگىسى كەلەدى. تاعى ءبىر بايقاعانىم: كەي كاسىپكەرلەر "ۇلتىم" دەپ ءسوز باستاپ، ۇپاي جيناۋعا تىرىسادى. ءبىراق شىن جاناشىرلىقتى تەك سوزبەن ەمەس، ىسپەن كورسەتەتىن ۋاقىت كەلدى. بۇل – ءرول وينايتىن ەمەس، ادال بولۋدى تالاپ ەتەتىن كەزەڭ. ءۇش اي ايلىق الماي كورمەيىنشە، بىرەۋدىڭ جانايقايىن ءتۇسىنۋ قيىن. سوندىقتان ءۇنسىز قالمايىق. جاعدايى ناشاردى ءتۇسىنىپ، ادىلدىك جاعىندا بولايىق…"
ونىڭ جازۋىنشا، Qazbilim ورتالىعىنىڭ كەيبىر مۇعالىمدەرى الەۋمەتتىك جەلىدە اشىق سويلەي المايدى ەكەن. سەبەبى جۇمىسقا قابىلدانار كەزدە "تەرىس پىكىر جازۋعا بولمايدى" دەگەن پۋنكتى بار كەلىسىمشارتقا قول قويدىرىپ الاتىن كورىنەدى. "بۇل دەگەنىمىز مەملەكەتكە، پرەزيدەنتكە دەگەن، ەلىمىزدىڭ مۇعالىمدەرىنە قارسى جۇمىس جاساۋ دەپ بىلەمىز" دەيدى.
سونداي-اق، ج.جاقىپوۆ Qazbilim ورتالىعى باسشىسىنىڭ سوتپەن قورقىتىپ وتىرعانىن دا حابارلادى.
"اياتجان احمەتجان ۇلى ەندى مەن ءۇشىن ۇلتشىل ۇستاز ەمەس. مەنىڭ كوزىم جەتتى: بۇل ازامات مەملەكەتتىڭ قارجىسىن الىپ، جەكە پايداسىن كۇيتتەپ وتىرعان كاسىپكەر عانا. ۇستازدارعا جانى اشيتىن ادام ەمەس، بەدەلىنە سىن كەلسە، اشۋعا بۋلىعىپ، جەكە باسىما ۋگروزا جاساۋدان تايىنبايتىن تۇلعا…
مەنىمەن سوتتاسقىسى كەلەتىنىن ايتىپ، جەكە حاتپەن قورقىتىپ جاتىر. مىنا سكرينشوتتاعى جازباسى – سونىڭ ايعاعى. اشىق ديالوگتان قاشىپ، جەكە حاتقا جاسىرىنىپ، قىسىم كورسەتۋگە كوشتى"، – دەپ جازدى ول.
الەۋمەتتىك جەلىدە ج.جاقىپوۆتى قولداپ جازىپ جاتقاندار از ەمەس ەكەن. ولاردىڭ اراسىندا ورتالىقتىڭ مۇعالىمدەرى دە بار. ال ج.جاقىپوۆ "ۋگروزا جاسادى" دەگەن Qazbilim ورتالىعىنىڭ جەتەكشىسى ا.احمەتجان: "مىندەتتى تۇردە سوتتا كەزدەسەمىز! قورقىتۋ ەمەس، ازاماتتىق ەسكەرتۋ! قۇقىقتىق مەملەكەتتىڭ ازاماتتارىمىز، ءبارى زاڭ جۇزىندە شەشىلەدى!" – دەگەن جازبا قالدىرىپتى...
