Qyrkúiektiń ortasynan beri Resei men Qazaqstan shekarasyndaǵy “Mashtakovo” ótkizý beketinde 2-3 myńǵa jýyq júk kóligi qańtarylyp tur. Qytaidan kelgen taýarlardy tiegen fýralar apta boiy qozǵala almai, uzyn-sonar kezek týdyrǵan, dep habarlaidy Dalanews.kz.
Kommersant usynǵan aqparatqa súiensek, buǵan batys sanktsiialaryna ilikken taýarlarǵa qatań tekseristiń kúsheiýi sebep bolǵan. Elektronika, drondar men belgili brendterdiń kiimderi túgel qosymsha baqylaýdan ótedi.
“Qazir shekarada kontrabandaǵa qarsy sharalar áldeqaida kúsheidi. Bul – sanktsiiaǵa ilingen jáne qosarly maqsattaǵy taýarlardyń tasymalyna jol bermeý úshin jasalyp otyr. Al qazaqstandyq tarap mundai uzyn kezektiń basty sebebin reseilik kedenshilerdiń “sur” importqa qarsy qatań sharalarymen bailanystyrady”, – deidi SLK kompaniiasynyń logistika bóliminiń jetekshisi Maksim Emelin.
Júk tasymalyna qosymsha qiyndyq týdyryp otyrǵan taǵy bir faktor – Qytaidaǵy “altyn apta” merekesi. 1-8 qazan aralyǵynda Qazaqstanmen aradaǵy barlyq avtojol beketteri jabyldy. Bul kúnderi tek “Dostyq”pen “Altynkól” temirjol ótkelderi jumys istep tur. Sonyń saldarynan jetkizilimder tipti baiaýlap ketti.
Qazaqstan da keiingi ailarda “sur” importqa qarsy baqylaýdy kúsheitken. Shekaradan ótken júk kólikteri tek bekette emes, el ishindegi joldarda da tekseriledi. Qalypty taýarlar 3-5 kúnde kedennen ótse, kúmándi júkter birneshe apta boiy kidiredi. Shekara beketteri men jol boiy qazir qańtarylǵan fýralarǵa toly.
“Mundai problemalar burynnan bar edi, biraq qazir ýshyǵyp tur. Kedendik odaq aiasyndaǵy integratsiia shyn máninde qaǵaz júzinde ǵana. Máselen, kelisim boiynsha tasymaldaýshylar bir-biriniń infraqurylymyn belgili bir aralyqqa deiin paidalana alady. Biraq Qazaqstanda ol aralyq bar bolǵany 2 shaqyrym”, – deidi logist Tomlin.
Keptelistiń taǵy bir sebebi retinde qarasha aiynan bastap engiziletin ýtilizatsiialyq alymnyń qymbattaýy, Polsha men Belarýs arasyndaǵy shekaranyń jabylýy jáne Qytai júk kólikterine beriletin ruqsatnamalardyń jetispeýshiligi atalady. Temirjolda da jaǵdai máz emes. “Qazaqstan temir joly” artyq júktemege bailanysty ázirge ózge elderdiń vagondaryn qabyldamai otyr.
