قىركۇيەكتىڭ ورتاسىنان بەرى رەسەي مەن قازاقستان شەكاراسىنداعى “ماشتاكوۆو” وتكىزۋ بەكەتىندە 2-3 مىڭعا جۋىق جۇك كولىگى قاڭتارىلىپ تۇر. قىتايدان كەلگەن تاۋارلاردى تيەگەن فۋرالار اپتا بويى قوزعالا الماي، ۇزىن-سونار كەزەك تۋدىرعان، دەپ حابارلايدى Dalanews.kz.
Kommersant ۇسىنعان اقپاراتقا سۇيەنسەك، بۇعان باتىس سانكسيالارىنا ىلىككەن تاۋارلارعا قاتاڭ تەكسەرىستىڭ كۇشەيۋى سەبەپ بولعان. ەلەكترونيكا، دروندار مەن بەلگىلى برەندتەردىڭ كيىمدەرى تۇگەل قوسىمشا باقىلاۋدان وتەدى.
“ءقازىر شەكارادا كونترابانداعا قارسى شارالار الدەقايدا كۇشەيدى. بۇل – سانكسياعا ىلىنگەن جانە قوسارلى ماقساتتاعى تاۋارلاردىڭ تاسىمالىنا جول بەرمەۋ ءۇشىن جاسالىپ وتىر. ال قازاقستاندىق تاراپ مۇنداي ۇزىن كەزەكتىڭ باستى سەبەبىن رەسەيلىك كەدەنشىلەردىڭ “سۇر” يمپورتقا قارسى قاتاڭ شارالارىمەن بايلانىستىرادى”، – دەيدى سلك كومپانياسىنىڭ لوگيستيكا ءبولىمىنىڭ جەتەكشىسى ماكسيم ەمەلين.
جۇك تاسىمالىنا قوسىمشا قيىندىق تۋدىرىپ وتىرعان تاعى ءبىر فاكتور – قىتايداعى “التىن اپتا” مەرەكەسى. 1-8 قازان ارالىعىندا قازاقستانمەن اراداعى بارلىق اۆتوجول بەكەتتەرى جابىلدى. بۇل كۇندەرى تەك “دوستىق”پەن “التىنكول” تەمىرجول وتكەلدەرى جۇمىس ىستەپ تۇر. سونىڭ سالدارىنان جەتكىزىلىمدەر ءتىپتى باياۋلاپ كەتتى.
قازاقستان دا كەيىنگى ايلاردا “سۇر” يمپورتقا قارسى باقىلاۋدى كۇشەيتكەن. شەكارادان وتكەن جۇك كولىكتەرى تەك بەكەتتە ەمەس، ەل ىشىندەگى جولداردا دا تەكسەرىلەدى. قالىپتى تاۋارلار 3-5 كۇندە كەدەننەن وتسە، كۇماندى جۇكتەر بىرنەشە اپتا بويى كىدىرەدى. شەكارا بەكەتتەرى مەن جول بويى ءقازىر قاڭتارىلعان فۋرالارعا تولى.
“مۇنداي پروبلەمالار بۇرىننان بار ەدى، ءبىراق ءقازىر ۋشىعىپ تۇر. كەدەندىك وداق اياسىنداعى ينتەگراسيا شىن مانىندە قاعاز جۇزىندە عانا. ماسەلەن، كەلىسىم بويىنشا تاسىمالداۋشىلار ءبىر-بىرىنىڭ ينفراقۇرىلىمىن بەلگىلى ءبىر ارالىققا دەيىن پايدالانا الادى. ءبىراق قازاقستاندا ول ارالىق بار بولعانى 2 شاقىرىم”، – دەيدى لوگيست توملين.
كەپتەلىستىڭ تاعى ءبىر سەبەبى رەتىندە قاراشا ايىنان باستاپ ەنگىزىلەتىن ۋتيليزاسيالىق الىمنىڭ قىمباتتاۋى، پولشا مەن بەلارۋس اراسىنداعى شەكارانىڭ جابىلۋى جانە جۇڭگو جۇك كولىكتەرىنە بەرىلەتىن رۇقساتنامالاردىڭ جەتىسپەۋشىلىگى اتالادى. تەمىرجولدا دا جاعداي ءماز ەمەس. “قازاقستان تەمىر جولى” ارتىق جۇكتەمەگە بايلانىستى ازىرگە وزگە ەلدەردىڭ ۆاگوندارىن قابىلداماي وتىر.
