Qazaqstandyq jankúierlerge jaqsy tanys ataqty aǵylshyn tuqymdy júirik Kabirhan uzaq úzilisten keiin qaitadan jeńiske jetti, dep habarlaidy dalanews.kz.
Ótken demalys kúnderi Piatigorsk ippodromynda ótken synaq jarysyna qatysqan júirik birden top jaryp, ataqty shabandoz Iu.A. Dopirany eske alýǵa arnalǵan báigede márege birinshi bolyp keldi. Bul — Kabirhannyń sońǵy eki jyldaǵy alǵashqy jeńisi.
Kabirhan qazaqstandyq kásipker Tlek Muqanbetqalievke tiesili. Hippodrom.ru saitynyń málimetinshe, Eýropa men Soltústik Amerikadaǵy birqatar sátsiz jarystardan keiin jylqy tájiribeli bapker, Kabardin-Balqar Respýblikasynyń mamany Arslangirei Shavýevke senimgerlik basqarýǵa berilgen. Sarapshylardyń aitýynsha, dál osy mamannyń eńbeginiń arqasynda Kabirhan 2023 jyly halyqaralyq deńgeige kóterilgen.
Júiriktiń eń jarqyn kezeńi eki jarym maýsym buryn bastaldy. Birikken Arab Ámirlikterinde ótken bedeldi Al Maktoum Challenge jarystarynyń eki kezeńinde jeńiske jetken Kabirhan keiin álemdegi eń iri báigelerdiń biri – júlde qory 7 million dollar bolatyn Dubai World Cup dodasyna joldama alǵan edi.
Álemdik deńgeidegi bul jarysta qazaqstandyq júirik jetinshi orynnan kórindi. Al 2023–2024 jylǵy maýsymda Kabirhan iesine jalpy kólemi 755 548 dollar bolatyn júlde qarjysyn ákeldi.
Alaida keiin júiriktiń joly bolmady. Sońǵy kezeńde Kabirhan alty jarysqa qatysyp, birde-birinde júldeli orynǵa ilige almady.
Osyǵan bailanysty iesi bapkerdi aýystyrý týraly sheshim qabyldaǵan. Amerikalyq maman Dýg Ýotsonnyń ornyna jylqymen Birikken Arab Ámirlikterinde birneshe márte chempion atanǵan, sondai-aq júlde qory 12 million dollar bolatyn Dýbai álem kýbogynyń jeńimpaz bapkeri Bhýpat Simara jumys istei bastaǵan.
Alaida bapkerler quramyndaǵy bul ózgeris te kútken nátijeni bermegen edi. Soǵan qaramastan, Piatigorskidegi sońǵy jeńis Kabirhannyń qaita babyna kele bastaǵanyn ańǵartty.
