Búgin Almaty qalasynda Qazaqstan musylmandarynyń kezekti VIII quryltaıy ótti. Quryltaı jumysyna din isteri jáne azamattyq qoǵam mınıstri Nurlan Ermekbaev, Qazaqstan musylmandary dinı basqarmasy tóralqa músheleri, ǵulamalar keńesiniń músheleri, teolog-ǵalymdar, zıaly qaýym ókilderi, elimizdiń ár oblysynan kelgen quryltaı delegattary qatysty.
Quryltaıda Qazaqstan musylmandary dinı basqarmasynyń 2013-2017 jyldar aralyǵynda atqarǵan is-sharalarynyń esebi tyńdaldy.
QMDB tóraǵasy Erjan qajy Malǵajyuly Bas múftı laýazymyna naıb múftı Serikbaı qajy Orazdyń kandıdatýrasyn usyndy.
– Qurmetti quryltaı delegattary, osydan 5 jyl buryn Bas múftı qyzmetine saılanǵanymda bul amanatty abyroımen atqaryp shyǵýdy Alladan surap edim. Sizdermen birge kóptegen aýqymdy is-sharalardy atqardyq. Bul amanatty orynbasarym Serikbaı qajy Orazǵa tapsyrýǵa sheshim qabyldadym. Ol 20 jyldan astam dinı salada qyzmet etip keledi. Dinı basqarma tarıhynda úsh múftıdiń kezeńinde belsendiligimen kózge tústi. Onyń ıdeıasy men iskerliginiń arqasynda kóptegen ıgi jobalar júzege asty. Serikbaı qajy Oraz Bas múftı qyzmetin joǵary deńgeıde atqarady degen senimdemin. Sizder de bul oıymdy quptaısyzdar dep oılaımyn, – dep atap ótti ol.
Quryltaıǵa jınalǵan 300 delegat Serikbaı qajy Orazǵa daýys berip, biraýyzdan Bas múftı laýazymyna saılady.
Serikbaı Satybaldyuly quryltaı delegaty aldynda dinı salada aıanbaı qyzmet etýge senim bildirdi.
Derekkózi: sputniknews.kz
