Memlekettik aýktsion saitynda Medeý shatqalyndaǵy úi kezekti ret saýdaǵa qoiyldy. Nysannyń bastapqy baǵasy 1,9 mlrd teńge dep kórsetilgenimen, úidiń naryqtyq quny 636 mln teńgege baǵalanǵan. Saýda-sattyq baǵany tómendetý tásilimen ótedi, dep habarlaidy Dalanews.kz.
Áńgime Almatynyń Medeý aýdanyndaǵy Kerei-Jánibek handar kóshesinde ornalasqan eki qabatty úi týraly bolyp otyr. Úidiń jalpy aýmaǵy – 272,5 sharshy metr. Nysan 2003 jyly salynǵan. Onyń ishinde bassein men saýna bar. Qazir bul múlik kommýnaldyq menshikte jáne Almaty qalasynyń Memlekettik aktivter basqarmasynyń balansynda tur.
Úidi satý áreketi 2022 jyldan beri jalǵasyp keledi. Ol kezde aýktsion baǵany kóterý formatynda ótkizilip, bastapqy quny 265 mln teńgeden bastalǵan. Alaida satyp alýshy tabylmaǵan.
Baǵalaý esebinde úi iesi retinde Zarema Arystanbekova kórsetilgen. Ol belgili memleket qairatkeri Haidar Arystanbekovtiń qyzy. Ashyq derekkózderdegi málimetke súiensek, Zarema Arystanbekova Qazaqstannyń Grýziiadaǵy burynǵy elshisi Baýyrjan Muhamedjanovtyń jubaiy. Ol ár jyldary ishki ister ministri, premer-ministrdiń orynbasary jáne Mańǵystaý oblysynyń ákimi qyzmetterin atqarǵan.
Saýda-sattyq búgin, 24 sáýir kúni saǵat 10:00-de bastaldy.
