7 qańtarda Qazaqstannyń 14 oblysynda daýyldy eskertý jarıalandy. Bul týraly "Qazgıdromet" RMK málimdedi, dep habarlaıdy Dalanews.kz.

Aqmola oblysynyń soltústigi, ońtústigi men shyǵysynda qar jaýyp, boran jáne kóktaıǵaq bolady. Jel batystan soǵyp, oblystyń soltústigi men shyǵysynda 15–20 m/s, túnde keı jerlerde 23–28 m/s-qa deıin kúsheıýi múmkin.

Astanada da qar jaýyp, jaıaý burqasyn bolady. Qala kóshelerinde kóktaıǵaq bolýy múmkin.

Pavlodar oblysynyń ońtústigi men shyǵysynda qar jaýyp, boran soǵady. Jeldiń jyldamdyǵy 15–20 m/s, túnde ekpini 23–28 m/s-qa deıin jetýi yqtımal.

Soltústik Qazaqstan oblysynyń soltústigi, shyǵysy jáne ońtústiginde jaıaý burqasyn bolýy múmkin.

Túrkistan oblysynyń batysy, ońtústigi jáne taýly aımaqtarynda tuman túsedi.

Atyraý oblysynyń batysy, ońtústigi men shyǵysynda tuman men kóktaıǵaq baıqalady. Kúndiz ońtústik jáne shyǵys baǵyttaǵy jel ekpini 15–20 m/s-qa deıin jetýi múmkin.

Aqtóbe oblysynyń soltústigi, shyǵysy jáne ońtústiginde tuman túsedi.

Batys Qazaqstan oblysynyń soltústik-batysynda qar jaýyp jaıaý burqasyn bolýy múmkin. Oblystyń batysy, soltústigi men shyǵysynda tuman jáne kóktaıǵaq bolady.

Mańǵystaý oblysynyń soltústigi men ortalyǵynda túnde jáne tańerteń tuman bolady.

Abaı oblysynyń batysy, soltústigi men ortalyǵynda qar, boran jáne kóktaıǵaq kútiledi.

Shyǵys Qazaqstan oblysynyń batysy, soltústigi jáne shyǵysynda qar, boran jáne kóktaıǵaq bolady. Soltústiginde keı ýaqytta qar qalyń túsýi múmkin.

Ulytaý oblysynyń shyǵysynda túnde qar jaýyp, jaıaý burqasyn bolady. Soltústigi, shyǵysy jáne ortalyǵynda tuman túsedi. Jeldiń jyldamdyǵy 15–20 m/s deıin soǵady.

Qaraǵandy oblysynyń soltústigi men shyǵysynda túnde qar jaýyp, boran soǵady. Oblystyń batysy, soltústigi jáne ońtústiginde tuman kútiledi.

Qyzylorda oblysynyń ortalyǵy, ońtústigi jáne soltústiginde tuman boljanady.

Qostanaı oblysynyń soltústigi, shyǵysy jáne ońtústiginde tuman kútiledi.