Jyl basynan beri Qarjylyq monitoring agenttigi janar-jaǵarmai materialdaryn Qazaqstannan zańsyz shyǵarýdyń 712 áreketiniń jolyn kesti, dep habarlaidy dalanews.kz.
QMA málimetinshe, Ishki ister ministrligi men UQK Shekara qyzmetimen birlesken jumystardyń nátijesinde munai ónimderiniń zańsyz ainalymy men kontrabandasyna qatysty 8 sotqa deiingi tergep-tekserý bastalǵan.
Mańǵystaý oblysynda 2022 jyldan beri esepke alynbaǵan 28,5 myń tonnadan astam munaidy óńdegen zańsyz shaǵyn munai óńdeý zaýyty anyqtaldy. Tergeý málimetinshe, óndirilgen ónim mazýt retinde rásimdelip, keiin shetelge shyǵarylǵan.
Al Túrkistan oblysynda memlekettik shekara astynan qazylǵan arnaiy tonnel arqyly Ózbekstanǵa benzin ótkizýmen ainalysqan transulttyq qylmystyq toptyń qyzmeti toqtatyldy. Bul is boiynsha kináliler uzaq merzimge bas bostandyǵynan aiyrylǵan.
Sonymen qatar Qyrǵyzstanǵa AI-92 markaly benzindi zańsyz tasymaldaǵan qylmystyq topqa qatysty tergeý aiaqtaldy. Zańsyz shyǵarylǵan janarmai kólemi 190 myń tonnadan asyp, onyń jalpy quny 37 milliard teńgeden joǵary bolǵan.
Sońǵy zańsyz tasymaldaý áreketteriniń birinde «Túrksib» stantsiiasynda shamamen 500 tonna benzin tielgen segiz temirjol tsisternasy ustaldy. Quny 138 million teńge bolatyn janarmai memleket kirisine tárkilendi.
Qarjylyq monitoring agenttigi eldiń ekonomikalyq qaýipsizdigin qamtamasyz etý jáne ishki naryqta janar-jaǵarmai tapshylyǵyna jol bermeý maqsatynda munai ónimderiniń zańsyz ainalymyna qarsy jumystar jalǵasatynyn málimdedi.
