Osy aptanyń basynan bastap Qazaqstan Respýblikasynyń aýmaǵynan barlyq kólik túrlerimen kartopty Eýraziialyq ekonomikalyq odaq elderinen basqa úshinshi elderge tasýǵa alty ai merzimge shekteý engizildi, dep habarlaidy Dalanews.kz.
"Qazirgi ýaqytta kórshiles elder tarapynan qazaqstandyq kartopqa joǵary suranys saqtalýda. 2024 jyldyń qorytyndysy boiynsha 605 myń tonnaǵa jýyq kartop eksporttalǵan, bul 2023 jylǵy kórsetkishten (411 myń tonna) 1,5 ese artyq. Bul kórsetkish sońǵy 10 jyldaǵy rekordtyq deńgeige jetip, ishki naryqtaǵy baǵalarǵa aitarlyqtai áser etti. Osyǵan bailanysty, naryqtaǵy jaǵdaidy turaqtandyrý jáne baǵanyń ósýine jol bermeý maqsatynda 2025 jylǵy 18 qańtarda ótken Syrtqy saýda saiasaty jáne halyqaralyq ekonomikalyq uiymdarǵa qatysý máseleleri jónindegi vedomstvoaralyq komissiianyń sheshimimen Qazaqstan Respýblikasynyń aýmaǵynan barlyq kólik túrlerimen kartopty úshinshi elderge eksporttaýǵa, Eýraziialyq ekonomikalyq odaq elderinen basqa, 6 ai merzimge shekteý engizildi", – dep jazylǵan Aýylsharýashylyǵy ministrligi habarlamasynda.
Vedomstvoaralyq komissiianyń sheshimi negizinde 2025 jylǵy 27 qańtardaǵy №26 QR Aýyl sharýashylyǵy ministriniń "Qazaqstan Respýblikasynyń aýmaǵynan kartopty eksporttaý máseleleri týraly" buiryǵymen úshinshi elderge barlyq kólik túrlerimen kartopty shyǵarýǵa tyiym salyndy.
Qabyldanǵan sharalar kartop baǵasynyń alypsatarlyq jolmen ósýine jáne naryq qatysýshylary tarapynan oryn alýy múmkin spekýliativti áreketterge jol bermeýge múmkindik beredi.
Buǵan deiin osyndai shekteý ázirlenip jatqany, óitkeni elimizde syrttan suranystyń artýyna bailanysty kartoptyń baǵasynyń kúrt qymbattaǵany habarlanǵan.
