Memleket basshysynyń tapsyrmasy boiynsha Qazaqstan Aýǵanstan halqyna gýmanitarlyq kómek joldap otyr. Aýǵanstannyń Balh provintsiiasyndaǵy Hairaton stantsiiasynda gýmanitarlyq júk aýǵan tarapyna berildi. Temir jolmen jetkizilgen júktiń jalpy kólemi 2,2 myń tonna. Bular ósimdik maiy, bidai uny, kúrish jarmasy, qysqy jáne jazǵy shatyrlar, kórpeler. Zárý dárilik zattar bar gýmanitarlyq kómektiń bir bóligi áýe kóligimen jiberilmek, dep habarlaidy Dalanews.kz.
Úkimet baspasóz qyzmetiniń habarlaýynsha, gýmanitarlyq kómek "KazAID" Qazaqstandyq halyqaralyq damý agenttiginiń járdemimen kórsetildi.
Qazaqstan Respýblikasynyń Aýǵanstandaǵy ýaqytsha senimdi ókili Ǵaziz Aqbasov atap ótkendei, Qazaqstan aýǵan halqyn qoldaýdy jalǵastyryp, eki el arasyndaǵy dostyq, saýda-ekonomikalyq bailanysty damytýdy dáiekti túrde qoldaidy. Tek gýmanitarlyq qana emes, taý-ken ónerkásibi, kólik, logistika men aýyl sharýashylyǵy salasyndaǵy yntymaqtastyqty tereńdetýge daiyn.
21–23 sáýir aralyǵynda vitse-premer – ulttyq ekonomika ministri Serik Jumanǵarin bastaǵan qazaqstandyq delegatsiia Kabýlǵa barady. Sapar sheńberinde Aýǵanstannyń resmi tulǵalarymen kezdesýler, qazaqstandyq taýarlardyń kórmesin ótkizý josparlanyp otyr.
