Qazaqstan Prezidenti óziniń 2019 jylǵy qyrkúiekte Pekinge memlekettik sapary men biylǵy aqpanda QHR-ǵa jumys sapary barysynda qol jetkizilgen mańyzdy ýaǵdalastyqtardyń júzege asyrylýyna oń baǵa berdi, dep habarlaidy Dalanews.kz Aqordaǵa silteme jasap.
Eki el arasyndaǵy uzaqmerzimdi strategiialyq seriktestik týraly joǵary deńgeide bekitilgen Deklaratsiia osy jumystardyń negizgi baǵyty ekeni atap ótildi.
"Biyl biz memleketterimiz arasyndaǵy diplomatiialyq qatynastardyń 30 jyldyǵyn atap ótemiz. Osydan 30 jyl buryn jańadan bastaǵan edik, qazir strategiialyq seriktespiz. Ekonomikalyq yntymaqtastyqta zor nátijelerge qol jetkizdik. Qazaqstan men Qytai álemdik arenada, eń aldymen, BUU jáne basqa da halyqaralyq uiymdar aiasynda jaqyn seriktester sanalady. Sondyqtan eki el arasyndaǵy ózara qarym-qatynastardyń qazirgi damý deńgeiine kóńilim tolady. Degenmen, bul yntymaqtastyǵymyz dáiekti túrde dami berýge tiis dep sanaimyn. Bir orynda turyp qalmai, jańa nátijelerge qol jetkizýimiz kerek", — dedi Prezident.
Qasym-Jomart Toqaev Qytai Tóraǵasy Si Tszinpinniń biylǵy qyrkúiekke josparlanǵan memlekettik saparyna Qazaqstannyń úlken úmit artyp otyrǵanyn atap ótti.
Memleket basshysynyń pikirinshe, aldaǵy joǵary deńgeidegi kelissózder qazaq-qytai qatynastaryn damytýǵa tyń serpin beredi.
Áńgimelesý barysynda bitimgershilik jáne áskeri-tehnikalyq salalardaǵy ekijaqty jáne kópjaqty yntymaqtastyqtyń qazirgi jaǵdaiy men perspektivalary talqylandy.
Memleket basshysy qazaqstandyq áskeri qyzmetshilerdiń BUU bitimgershilik operatsiialaryndaǵy qatysý geografiiasyn keńeitýge elimizdiń daiyn ekenine basa mán berdi. Osyǵan bailanysty Prezident Pekinniń atalǵan ámbebap uiym aiasynda ujymdyq missiia ótkizý týraly bastamasyn qoldady.
Óz kezeginde Vei Fenhe Qytai tarapynyń osy saladaǵy ózara tiimdi kooperatsiiany odan ári damytýǵa daiyn ekenin rastady. Onyń pikirinshe, Qarýly Kúshterdiń áleýetin arttyrý jáne memleketimizdiń qorǵanys qabiletin nyǵaitý úshin júzege asyrylyp jatqan reformalar negizinen bul baǵyttaǵy jetistikterge yqpal etedi. Ministr Qazaqstannyń ishki jáne syrtqy saiasatyna joǵary baǵa berdi.
Sonymen qatar kezdesýde halyqaralyq jáne aimaqtyq kún tártibindegi ózekti máseleler qarastyryldy.
