قاسىم-جومارت توقايەۆ قازاقستانعا رەسمي ساپارمەن كەلگەن جۇڭگو حالىق رەسپۋبليكاسى مەملەكەتتىك كەڭەسىنىڭ مۇشەسى، قورعانىس ءمينيسترى ۆەي فەنحەنى قابىلدادى.

قازاقستان پرەزيدەنتى ءوزىنىڭ 2019 جىلعى قىركۇيەكتە پەكينگە مەملەكەتتىك ساپارى مەن بيىلعى اقپاندا قحر-عا جۇمىس ساپارى بارىسىندا قول جەتكىزىلگەن ماڭىزدى ۋاعدالاستىقتاردىڭ جۇزەگە اسىرىلۋىنا وڭ باعا بەردى، دەپ حابارلايدى Dalanews.kz اقورداعا سىلتەمە جاساپ.

ەكى ەل اراسىنداعى ۇزاقمەرزىمدى ستراتەگيالىق سەرىكتەستىك تۋرالى جوعارى دەڭگەيدە بەكىتىلگەن دەكلاراسيا وسى جۇمىستاردىڭ نەگىزگى باعىتى ەكەنى اتاپ ءوتىلدى.

"بيىل ءبىز مەملەكەتتەرىمىز اراسىنداعى ديپلوماتيالىق قاتىناستاردىڭ 30 جىلدىعىن اتاپ وتەمىز. وسىدان 30 جىل بۇرىن جاڭادان باستاعان ەدىك، ءقازىر ستراتەگيالىق سەرىكتەسپىز. ەكونوميكالىق ىنتىماقتاستىقتا زور ناتيجەلەرگە قول جەتكىزدىك. قازاقستان مەن جۇڭگو الەمدىك ارەنادا، ەڭ الدىمەن، بۇۇ جانە باسقا دا حالىقارالىق ۇيىمدار اياسىندا جاقىن سەرىكتەستەر سانالادى. سوندىقتان ەكى ەل اراسىنداعى ءوزارا قارىم-قاتىناستاردىڭ قازىرگى دامۋ دەڭگەيىنە كوڭىلىم تولادى. دەگەنمەن، بۇل ىنتىماقتاستىعىمىز دايەكتى تۇردە دامي بەرۋگە ءتيىس دەپ سانايمىن. ءبىر ورىندا تۇرىپ قالماي، جاڭا ناتيجەلەرگە قول جەتكىزۋىمىز كەرەك"، — دەدى پرەزيدەنت.

قاسىم-جومارت توقايەۆ جۇڭگو ءتوراعاسى سي ءسزينپيننىڭ بيىلعى قىركۇيەككە جوسپارلانعان مەملەكەتتىك ساپارىنا قازاقستاننىڭ ۇلكەن ءۇمىت ارتىپ وتىرعانىن اتاپ ءوتتى.

مەملەكەت باسشىسىنىڭ پىكىرىنشە، الداعى جوعارى دەڭگەيدەگى كەلىسسوزدەر قازاق-قىتاي قاتىناستارىن دامىتۋعا تىڭ سەرپىن بەرەدى.

اڭگىمەلەسۋ بارىسىندا بىتىمگەرشىلىك جانە اسكەري-تەحنيكالىق سالالارداعى ەكىجاقتى جانە كوپجاقتى ىنتىماقتاستىقتىڭ قازىرگى جاعدايى مەن پەرسپەكتيۆالارى تالقىلاندى.

مەملەكەت باسشىسى قازاقستاندىق اسكەري قىزمەتشىلەردىڭ بۇۇ بىتىمگەرشىلىك وپەراسيالارىنداعى قاتىسۋ گەوگرافياسىن كەڭەيتۋگە ەلىمىزدىڭ دايىن ەكەنىنە باسا ءمان بەردى. وسىعان بايلانىستى پرەزيدەنت پەكيننىڭ اتالعان امبەباپ ۇيىم اياسىندا ۇجىمدىق ميسسيا وتكىزۋ تۋرالى باستاماسىن قولدادى.

ءوز كەزەگىندە ۆەي فەنحە جۇڭگو تاراپىنىڭ وسى سالاداعى ءوزارا ءتيىمدى كووپەراسيانى ودان ءارى دامىتۋعا دايىن ەكەنىن راستادى. ونىڭ پىكىرىنشە، قارۋلى كۇشتەردىڭ الەۋەتىن ارتتىرۋ جانە مەملەكەتىمىزدىڭ قورعانىس قابىلەتىن نىعايتۋ ءۇشىن جۇزەگە اسىرىلىپ جاتقان رەفورمالار نەگىزىنەن بۇل باعىتتاعى جەتىستىكتەرگە ىقپال ەتەدى. مينيستر قازاقستاننىڭ ىشكى جانە سىرتقى ساياساتىنا جوعارى باعا بەردى.

سونىمەن قاتار كەزدەسۋدە حالىقارالىق جانە ايماقتىق كۇن تارتىبىندەگى وزەكتى ماسەلەلەر قاراستىرىلدى.