Eń qýatty sýperkompúterdiń ónimdiligi shamamen 2 ekzaflopsty quraıdy. Bul – Ortalyq Azıa tarıhyndaǵy alǵashqy sýperkompúterlik klaster. Ol jasandy ıntellekt pen joǵary ónimdi esepteýlerge arnaıy jasalǵan NVIDIA H200 jańa grafıkalyq chıpteriniń negizinde jınaqtalǵan. Bul elimizdi halyqaralyq IT-kompanıalar men derekter ortalyǵy operatorlary úshin áldeqaıda tartymdy etedi, dep habarlaıdy Dalanews.kz.
Sýperkompúterdi ornatý jáne iske qosý onyń úzdiksiz ári turaqty jumysyn qamtamasyz etý úshin Tier III senimdilik deńgeıindegi SDIAÓM-tiń jańa derekter ortalyǵynda júzege asyrylady. Mundaı qýattylyq búginde densaýlyq saqtaý, energetıka, bilim berý jáne memlekettik qyzmetter sıaqty barlyq salalarda qoldanys tabýda.
Eń bastysy — sýperkompúter resýrstary barshaǵa qoljetimdi bolady. Olarǵa neırondyq jelilerdi oqytý úshin esepteý qýaty qajet startaptar, irgeli jáne qoldanbaly zertteýler júrgizetin ýnıversıtetter, sondaı-aq jasandy ıntellektti bıznes-prosesterge engizip jatqan ǵylymı ortalyqtar men kompanıalar qosyla alady.
"Sýperkompúterdiń jetkizilýi Qazaqstanda joǵary ónimdi esepteýler ekojúıesin damytýǵa jol ashty. Aıta ketý kerek, osynyń aıasynda Qazaqstan alǵash ret joǵary tehnologıalyq jabdyqty kedendik baj ben QQS-tan bosatý mehanızmin qurdy. Bul elimizdi halyqaralyq IT-kompanıalar men derekter ortalyǵy operatorlary úshin áldeqaıda tartymdy etedi", delingen Sıfrlyq damý mınıstrligi habarlamasynda.
Aıta ketken jón, Ábý-Dabıdiń taq murageri sheıh Haled ben Muhammed ben Zaıd ál Nahaıannyń Qazaqstanǵa resmı sapary aıasynda Astanada Presight (G42) kompanıasynyń sheteldik keńsesiniń ashylýy ótti. Sapar barysynda Qazaqstan Respýblıkasynyń Sıfrlyq damý, ınovasıalar jáne aeroǵarysh ónerkásibi mınıstrligi men Presight kompanıasy arasynda elimizde sýperkompúterlik klaster qurý jóninde kelisimge qol qoıyldy.
"Bul — eldiń sıfrlyq ınfraqurylymyn damytýdaǵy strategıalyq mańyzy bar qadam. Ol Qazaqstannyń sıfrlyq egemendigin jáne JI tehnologıalaryn damytý men jahandyq IT oıynshylaryn tartý baǵytyndaǵy óńirlik kóshbasshylyǵyn nyǵaıtady", — dep atap ótti Qazaqstan Respýblıkasynyń Sıfrlyq damý, ınovasıalar jáne aeroǵarysh ónerkásibi mınıstri Jaslan Mádıev.
Bul joba — 2029 jylǵa deıingi jasandy ıntellektti damytý tujyrymdamasyn is júzinde júzege asyrýdyń mańyzdy elementi ári Qazaqstannyń zamanaýı IT-ınfraqurylymyn qalyptastyrý jolyndaǵy negizgi kezeńderdiń biri bolyp tabylady.
