ەڭ قۋاتتى سۋپەركومپيۋتەردىڭ ونىمدىلىگى شامامەن 2 ەكزافلوپستى قۇرايدى. بۇل – ورتالىق ازيا تاريحىنداعى العاشقى سۋپەركومپيۋتەرلىك كلاستەر. ول جاساندى ينتەللەكت پەن جوعارى ءونىمدى ەسەپتەۋلەرگە ارنايى جاسالعان NVIDIA H200 جاڭا گرافيكالىق چيپتەرىنىڭ نەگىزىندە جيناقتالعان. بۇل ەلىمىزدى حالىقارالىق IT-كومپانيالار مەن دەرەكتەر ورتالىعى وپەراتورلارى ءۇشىن الدەقايدا تارتىمدى ەتەدى، دەپ حابارلايدى Dalanews.kz.
سۋپەركومپيۋتەردى ورناتۋ جانە ىسكە قوسۋ ونىڭ ۇزدىكسىز ءارى تۇراقتى جۇمىسىن قامتاماسىز ەتۋ ءۇشىن Tier III سەنىمدىلىك دەڭگەيىندەگى ءسدياوم-تىڭ جاڭا دەرەكتەر ورتالىعىندا جۇزەگە اسىرىلادى. مۇنداي قۋاتتىلىق بۇگىندە دەنساۋلىق ساقتاۋ، ەنەرگەتيكا، ءبىلىم بەرۋ جانە مەملەكەتتىك قىزمەتتەر سياقتى بارلىق سالالاردا قولدانىس تابۋدا.
ەڭ باستىسى — سۋپەركومپيۋتەر رەسۋرستارى بارشاعا قولجەتىمدى بولادى. ولارعا نەيروندىق جەلىلەردى وقىتۋ ءۇشىن ەسەپتەۋ قۋاتى قاجەت ستارتاپتار، ىرگەلى جانە قولدانبالى زەرتتەۋلەر جۇرگىزەتىن ۋنيۆەرسيتەتتەر، سونداي-اق جاساندى ينتەللەكتتى بيزنەس-پروسەستەرگە ەنگىزىپ جاتقان عىلىمي ورتالىقتار مەن كومپانيالار قوسىلا الادى.
"سۋپەركومپيۋتەردىڭ جەتكىزىلۋى قازاقستاندا جوعارى ءونىمدى ەسەپتەۋلەر ەكوجۇيەسىن دامىتۋعا جول اشتى. ايتا كەتۋ كەرەك، وسىنىڭ اياسىندا قازاقستان العاش رەت جوعارى تەحنولوگيالىق جابدىقتى كەدەندىك باج بەن ققس-تان بوساتۋ مەحانيزمىن قۇردى. بۇل ەلىمىزدى حالىقارالىق IT-كومپانيالار مەن دەرەكتەر ورتالىعى وپەراتورلارى ءۇشىن الدەقايدا تارتىمدى ەتەدى"، دەلىنگەن سيفرلىق دامۋ مينيسترلىگى حابارلاماسىندا.
ايتا كەتكەن ءجون، ءابۋ-دابيدىڭ تاق مۇراگەرى شەيح حالەد بەن مۇحاممەد بەن زايد ءال ناحاياننىڭ قازاقستانعا رەسمي ساپارى اياسىندا استانادا Presight (G42) كومپانياسىنىڭ شەتەلدىك كەڭسەسىنىڭ اشىلۋى ءوتتى. ساپار بارىسىندا قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەن Presight كومپانياسى اراسىندا ەلىمىزدە سۋپەركومپيۋتەرلىك كلاستەر قۇرۋ جونىندە كەلىسىمگە قول قويىلدى.
"بۇل — ەلدىڭ سيفرلىق ينفراقۇرىلىمىن دامىتۋداعى ستراتەگيالىق ماڭىزى بار قادام. ول قازاقستاننىڭ سيفرلىق ەگەمەندىگىن جانە جي تەحنولوگيالارىن دامىتۋ مەن جاھاندىق IT ويىنشىلارىن تارتۋ باعىتىنداعى وڭىرلىك كوشباسشىلىعىن نىعايتادى"، — دەپ اتاپ ءوتتى قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ.
بۇل جوبا — 2029 جىلعا دەيىنگى جاساندى ينتەللەكتتى دامىتۋ تۇجىرىمداماسىن ءىس جۇزىندە جۇزەگە اسىرۋدىڭ ماڭىزدى ەلەمەنتى ءارى قازاقستاننىڭ زاماناۋي IT-ينفراقۇرىلىمىن قالىپتاستىرۋ جولىنداعى نەگىزگى كەزەڭدەردىڭ ءبىرى بولىپ تابىلادى.
