Qazaqstanda azamattarǵa nesie berý tártibine ózgeris engizý usynyldy. Jańa talap boiynsha, bankter endi qaryz alýshynyń tek ai saiynǵy tólem qabiletine ǵana emes, onyń barlyq qaryzynyń kólemine de nazar aýdarady. Iaǵni adamnyń jiyntyq nesiesi onyń jyldyq tabysynan segiz eseden aspaýy tiis, dep habarlaidy dalanews.kz.
Finratings.kz málimetinshe, norma 2027 jyldyń 1 qańtarynan bastap kúshine enýi múmkin. Jańa erejege sáikes, bankter klienttiń barlyq qarjylyq mindettemesin esepke alady. Onyń ishinde ipoteka, avtonesie, tutynýshylyq kredit, bólip tóleý qyzmetteri men mikrokreditter de bar.
Mysaly, eger azamat aiyna 300 myń teńge jalaqy alsa, onyń jyldyq tabysy 3,6 million teńge bolady. Demek, mundai adamnyń barlyq nesiesiniń jalpy kólemi 28,8 million teńgeden aspaýy kerek.
Al ailyǵy 500 myń teńge bolatyn adamnyń limiti shamamen 48 million teńgeni quraýy múmkin. Eger azamat aiyna 800 myń teńge tabys tapsa, onyń eń joǵary qaryz kólemi 76,8 million teńgege deiin jetedi.
Materialda qazir kóptegen qazaqstandyqtardyń bir ýaqytta ipoteka, avtonesie jáne birneshe bólip tóleýdi rásimdep júrgeni aitylǵan. Osyǵan bailanysty jańa júie engizilse, qosymsha nesie alý qiyndaýy yqtimal. Ásirese birneshe belsendi rassrochkasy, kredit kartasy nemese mikrokrediti bar azamattar úshin shekteý kúsheiedi.
Sondai-aq endi bólip tóleý servisteri de tolyqqandy qaryz retinde esepteledi. Mysaly, Kaspi Red nemese basqa da rassrochka qyzmetteri adamnyń jalpy borysh júktemesine qosylady. Kredittik kartadaǵy paidalanylǵan limit pen mikrokreditter de esepke alynbaq.
Sarapshylardyń pikirinshe, bul bastama halyqtyń shamadan tys qaryzǵa batýyn azaitýǵa baǵyttalǵan. Sebebi sońǵy jyldary Qazaqstanda tutynýshylyq nesie kólemi kúrt ósken. Bankter endi klienttiń naqty tabysyna kóbirek mán berip, qarjylyq táýekeli joǵary azamattarǵa qaryz berýdi shekteýi múmkin.
Degenmen jańa júie keibir qazaqstandyqtardyń nesie alýyn qiyndatýy yqtimal. Ásirese tabysy tómen nemese birneshe belsendi nesiesi bar azamattarǵa bank tarapynan talap kúsheiýi múmkin.
