2026 jyldyń alǵashqy toǵyz aiynda Tutynýshylardyń quqyqtaryn qorǵaý komiteti men onyń aýmaqtyq departamentterine 72,6 myńǵa jýyq ótinish túsken. Azamattar kóbine bólshek jáne elektrondyq saýda, turmystyq qyzmet kórsetý men turǵyn úi-kommýnaldyq sharýashylyq salalaryna shaǵymdanǵan, dep habarlaidy dalanews.kz.
Komitettiń esepti kezeńdegi jumysy aýmaqtyq departament basshylary qatysqan keńeste qorytyndylandy.
Túsken ótinishterdiń 23,1 myńy, iaǵni 31,9 paiyzy boiynsha tutynýshylardyń talaptary qanaǵattandyrylǵan. Taǵy 26,6 myń adamǵa quqyqtyq kómek kórsetilip, 16 myń ótinish quzyretine qarai tiisti memlekettik organdarǵa joldanǵan.
Toǵyz ai ishinde aýmaqtyq departamentter kásipkerlik sýbektilerine 1 347 tekserý júrgizdi. Bul 2025 jyldyń sáikes kezeńimen salystyrǵanda 38 paiyzǵa kóp.
Tekserý nátijesinde 1 836 ákimshilik is qozǵalyp, jalpy somasy 54,3 mln teńge aiyppul salynǵan.
Qabyldanǵan sharalardyń nátijesinde tutynýshylardyń 2,1 mlrd teńge kólemindegi quqyǵy qorǵaldy. Bul somaǵa azamattarǵa aqshasyn qaitarý, taýardy aiyrbastaý jáne aýystyrý jaǵdailary kiredi. Salystyrý úshin, 2025 jyldyń osy kezeńinde atalǵan kórsetkish 1,9 mlrd teńge bolǵan.
Sonymen qatar qoǵam nazaryn aýdarǵan 107 is jeke qaraldy. Sonyń aiasynda 365 tutynýshyǵa 1,03 mlrd teńge kóleminde kómek kórsetilgen.
Aýmaqtyq departamentter Batys Qazaqstan, Shyǵys Qazaqstan jáne Jetisý oblystary men Shymkent qalasynda segiz sot talabyn bergen. Nátijesinde 144 tutynýshynyń quqyǵy qorǵalyp, olarǵa 5,86 mln teńgeden astam qarajat qaitaryldy.
Keńeste aýmaqtyq departamentterdegi telefon bailanysynyń qoljetimdiligi men keńes berý sapasyna qatysty shaǵymdar da talqylandy. Bólimshe basshylaryna bailanys nómirlerin jańartyp, telefon jelileriniń turaqty jumysyn qamtamasyz etý jáne azamattarǵa kórsetiletin keńestiń sapasyn arttyrý tapsyryldy.
