Qazaqstanda estý qabileti buzylǵan azamattardy estý apparattarymen qamtamasyz etý tártibi ózgerdi. Endi meditsinalyq kórsetilim bolǵan jaǵdaida patsientter múgedektik mártebesine qaramastan estý apparatyn ala alady. Bul týraly Densaýlyq saqtaý ministrligi málimdedi, dep habarlaidy dalanews.kz.
Vedomstvonyń málimetinshe, buǵan deiin estý apparattary tek múgedektigi bar azamattardyń jekelegen sanattaryna berilse, endi sýrdolog dárigerdiń qorytyndysy negizinde kómek alýshylar qatary keńeiedi.
Jańa júie aiasynda patsientter estý apparatyn ǵana emes, ony irikteý, baptaý, qulaq qalyptamasyn daiyndaý, qoldanýdy úiretý jáne servistik qyzmet kórsetý siiaqty keshendi qyzmettermen qamtylady.
Densaýlyq saqtaý ministrligi bul ózgeris myńdaǵan qazaqstandyqtyń estý qabiletin ýaqytyly ońaltyp, ómir sapasyn jaqsartýǵa múmkindik beretinin atap ótti.
