Qazaqstannyń avtomobil naryǵynda qytailyq brendterdiń úlesi artyp keledi, dep habarlaidy dalanews.kz.
Kolesa.kz málimetinshe, 2026 jyldyń qańtar–shilde ailarynda elde 121,2 myń jańa jeńil jáne kommertsiialyq kólik satylǵan. Eń kóp suranysqa ie 20 modeldiń jartysynan astamyn Qytaida shyǵarylatyn avtomobilder qurady.
Jekelegen modelder arasynda Chevrolet Cobalt kósh bastap tur. Jyl basynan beri qazaqstandyqtar osy modeldiń 19 052 danasyn satyp alǵan. Onyń satylymy ekinshi oryndaǵy Hyundai Tucson kórsetkishinen eki esege jýyq joǵary. Atalǵan krossover 10 452 danamen ótken.
Úshinshi orynǵa 6020 kólik satylǵan Kia Sportage jaiǵasty. Al alǵashqy bestikti Changan CS55 Plus pen Hyundai Mufasa túiindedi. Olardyń satylymy tiisinshe 4687 jáne 3872 avtomobildi qurady.
Brendter reitinginde Hyundai ázirge birinshi orynda. Jeti aida kompaniia 20 648 kólik ótkizgen. Chevrolet odan nebári 241 avtomobilge qalyp, 20 407 danamen ekinshi satyǵa ornalasqan. Úshinshi orynda 14 823 kólik satqan Kia tur.
Naryqtaǵy qytailyq markalardyń kórsetkishi de aitarlyqtai ósken. Changan 11 927, Chery 9686, Haval 7590, Jetour 6903, JAC 5739, al Geely 3794 avtomobil satqan. Toyota-nyń jeti aidaǵy nátijesi 4961 kólikti qurady.
