Belgili qazaqstandyq jýrnalist, ZonaKZ basylymynyń burynǵy bas redaktory Iýrii Mizinov 77 jasqa qaraǵan shaǵynda dúnieden ótti. Bul týraly Mádeniet jáne aqparat ministrligi habarlady.
Iýrii Mizinov 1950 jylǵy 18 qańtarda Oral qalasynda dúniege kelgen. Qaraǵandy politehnikalyq institýtyn "injener-ekonomist" mamandyǵy boiynsha támamdaǵan. Eńbek jolyn oblystyq statistika basqarmasy men jobalaý uiymdarynda bastaǵan.
1991-1992 jyldary ol "Sary-Arqa" telekompaniiasyn basqardy. Keiin "Zebra", "Koleso", «Grach» jáne «Farengeit boiynsha 451°» gazetteriniń redaktsiialarynda basshylyq qyzmet atqardy.
2000 jyldyń qańtarynda Iýrii Mizinov Jánibek Súleev jáne Aigúl Omarovamen birge «Navigator» internet-gazetiniń negizin qalady. Keiin redaktsiia quramyna Gimran Erǵaliev qosyldy. 2006 jylǵy mamyrda basylym ZonaKZ ataýyna kóshti.
«Navigator» men ZonaKZ qazaqstandyq qoǵamdyq-saiasi internet-jýrnalistikanyń qalyptasýyna eleýli úles qosty. Basylym betterinde jańalyqtar, suhbattar, saraptamalyq materialdar men baspasózge sholýlar turaqty jariialanyp otyrdy.
ZonaKZ 25 jyldyq jumysynan keiin 2025 jylǵy 1 aqpanda qyzmetin toqtatty. Basylymnyń sońǵy úndeýinde Iýrii Mizinov áriptesteri men oqyrmandaryna, sondai-aq jubaiy Elenaǵa alǵys bildirgen.
2020 jyly jýrnalist azamattyq qoǵamdy damytýǵa qosqan úlesi úshin Qazaqstan Jýrnalister odaǵynyń altyn medalimen marapattaldy. Sonymen qatar ol Jýrnalister odaǵy syilyǵynyń laýreaty jáne «Qazaqstannyń qurmetti jýrnalisi» tósbelgisiniń iegeri boldy.
Iýrii Mizinovtyń qaitys bolý sebebi ázirge jariialanǵan joq.
