31 tamyzdan bastap Qazaqstanda áielderge arnalǵan «Umai» ipotekalyq baǵdarlamasy boiynsha ótinim qabyldaý bastalady. Baǵdarlama arqyly qazaqstandyq áielder 50 million teńgege deiin turǵyn úi nesiesin rásimdei alady, dep habarlaidy dalanews.kz.
Baǵdarlama sharttaryna sáikes, óńirlerde satyp alynatyn baspananyń bastapqy jarnasy keminde 15 paiyz bolýy tiis. Al Astana men Almaty qalalarynda alǵashqy jarna kólemi turǵyn úi qunynyń keminde 20 paiyzy.
Nesie jyldyq 14,8 paiyzdyq mólsherlememen beriledi. Jyldyq tiimdi syiaqy mólsherlemesi 16,3–16,8 paiyz aralyǵynda bolady. Baǵdarlama boiynsha beriletin qaryzdyń eń joǵary somasy – 50 million teńge.
Ótinim berýshi otbasynyń ortasha ailyq taza tabysy 1,25 million teńgeden aspaýy qajet. Qajet bolǵan jaǵdaida qosalqy qaryz alýshyny tartýǵa múmkindik qarastyrylǵan.
Baǵdarlamaǵa qatysý úshin áiel adamnyń resmi jumysy men turaqty tabysy bolýy shart. Sonymen qatar ótinim berýshiniń atynda basqa turǵyn úidiń bolýy nemese onyń otbasylyq jaǵdaiy ipoteka rásimdeýge áser etpeidi.
«Umai» baǵdarlamasy aiasynda paidalanýǵa berilgen jańa turǵyn úilerden páter satyp alýǵa bolady. Sondai-aq Qazaqstan turǵyn úi kompaniiasynyń kepildigi nemese saqtandyrý tetigi bolǵan jaǵdaida salynyp jatqan turǵyn úiden baspana alý múmkindigi qarastyrylǵan.
Buǵan qosa, ipoteka arqyly qaitalama naryqtaǵy turǵyn úidi de satyp alýǵa ruqsat etiledi. Alaida mundai baspana 2016 jyldan buryn salynbaǵan bolýy kerek.
Eske salaiyq, «Umai» ipotekalyq baǵdarlamasy alǵash ret 2021 jyly iske qosylǵan bolatyn. 2023 jyly baǵdarlama boiynsha bólingen limit birneshe saǵat ishinde tolyq igerildi. Baǵdarlamany 2025 jyly qaita bastaý josparlanǵanymen, keiin onyń iske qosylý merzimi 2026 jylǵa aýystyrylǵan edi.
