2025-2026 oqý jylynda Qazaqstan daryndy oqýshylardy qoldaý jumysyn kúsheitti. 80-nen astam respýblikalyq ziiatkerlik jarysqa 1,6 mln-ǵa jýyq oqýshy qatysty, dep habarlaidy dalanews.kz.
Halyqaralyq deńgeide el namysyn 5 052 oqýshy qorǵady. Olar 37 olimpiada men ǵylymi konkýrsqa qatysyp, 1 026 medal jeńip aldy. Onyń ishinde 190 altyn, 332 kúmis jáne 504 qola medal bar. Taǵy 56 qatysýshy arnaiy marapattarǵa ie boldy.
Matematika baǵytyndaǵy jetistikterdi bólek atap ótken jón. Qazaqstan quramasy Vilniýste ótken European Mathematical Olympiad jarysynda absoliýtti kóshbasshy atandy. Saloniki qalasynda ótken Balkan Mathematical Olympiad jarysynda komanda myqty matematikalyq mektepteri bar elder arasynda jalpykomandalyq esepte 6-oryn aldy.
Qazaqstandyq oqýshylar Finikste ótken álemdegi eń iri ǵylymi-injenerlik kórme Regeneron ISEF-ke de qatysty. Qatysýshylardyń biri jasandy intellektini qoldaný arqyly onkologiialyq aýrýlardy erte anyqtaý jobasy úshin arnaiy marapat pen sheteldik ýniversitettiń bilim grantyn aldy.
Hiýstonda ótken robototehnika boiynsha halyqaralyq jarystarda qazaqstandyq oqýshylar 50 myńnan astam qatysýshy arasynda 12 nagradaǵa ie boldy. Kúzdiń sońyna deiin el oqýshylary taǵy 10-nan astam halyqaralyq jarysqa qatysýdy josparlap otyr.
Memleket basshysy Qasym-Jomart Toqaevtyń tapsyrmasy boiynsha halyqaralyq olimpiadalar men ǵylymi konkýrstardyń jeńimpazdary men júldegerleri birjolǵy tólem alady. Altyn medal úshin 1500 ailyq eseptik kórsetkish, kúmis medal úshin 1000, qola medal úshin 500 ailyq eseptik kórsetkish qarastyrylǵan. Pedagog-jattyqtyrýshylar 8,5-ten 26,5-ke deiingi bazalyq laýazymdyq ailyqaqy kóleminde yntalandyrý tólemderin alady.
Eske salaiyq, 2025 jylǵy tamyzda Memleket basshysy olimpiada jeńimpazdarymen alǵash ret Aqordada kezdesti. Tamyz keńesi aiasynda ol olardyń tálimgerlerin de memlekettik nagradalarmen marapattady.
