Qytai Halyq Respýblikasynyń Sýchjoý qalasynda 12-20 shilde aralyǵynda ótken ekonomikadan halyqaralyq olimpiadada (International Economics Olympiad, IEO 2026) qazaqstandyq oqýshylar joǵary nátije kórsetti. Álemniń 61 elinen 300-ge jýyq daryndy oqýshy qatysqan bedeldi bilim dodasynda Qazaqstan quramasy bir altyn, úsh kúmis jáne bir qola medal jeńip aldy, dep habarlaidy dalanews.kz.
Qazaqstan quramasynyń qorjynyna bir altyn, úsh kúmis jáne bir qola medal tústi:
Muhtarhan Batyrhan - Astana qalasy Nura aýdanyndaǵy NIS-tiń 11-synyp oqýshysy, altyn medal jeńip alyp, halyqaralyq ekonomika olimpiadasynyń eki dúrkin altyn júldegeri atandy.
Kemelov Dinmýhammed - Almaty qalasy Medeý aýdanyndaǵy NIS-tiń 11-synyp oqýshysy, kúmis medal.
Japarov Altair - Almaty qalasy Medeý aýdanyndaǵy NIS-tiń 11-synyp oqýshysy, kúmis medal.
Sultanbek Arýjan - Almaty qalasyndaǵy «Miras» halyqaralyq mektebiniń 11-synyp oqýshysy, kúmis medal.
Qýanyshbek Temirlan - Almaty qalasy Medeý aýdanyndaǵy NIS-tiń 10-synyp oqýshysy, qola medal.
Ulttyq quramany «Teenvestor» mektebiniń direktory, ulttyq qurama jattyqtyrýshysy Rýslan Mýldashev jáne «Daryn» respýblikalyq ǵylymi-praktikalyq ortalyǵynyń ádiskeri Zere Jarlagapova daiyndady.
Qazaqstandyq oqýshylardyń bul jetistigi elimizde daryndy jastardy qoldaý jáne olardy halyqaralyq olimpiadalarǵa júieli daiarlaý jumysynyń nátijesin kórsetti. Álemniń 61 elinen jinalǵan úzdikter arasyndaǵy tabysty óner kórsetý qazaqstandyq oqýshylardyń ekonomika, qarjy jáne biznes baǵyttary boiynsha halyqaralyq deńgeidegi básekege qabilettiligin taǵy bir márte dáleldedi.
Halyqaralyq ekonomika olimpiadasy (International Economics Olympiad, IEO) - ekonomika, qarjy jáne biznes salasyndaǵy daryndy mektep oqýshylaryn biriktiretin álemdegi eń bedeldi ziiatkerlik jarystardyń biri. Olimpiada barysynda qatysýshylardyń ekonomika, qarjy jáne biznes baǵyttary boiynsha bilimi, analitikalyq oilaý qabileti men praktikalyq jaǵdaida tiimdi sheshim qabyldaý daǵdylary baǵalanady.
