Qazaqstandyq boksshy Abylaihan Júsipov ýkrainalyq "Mirotvorets" saitynyń derekqoryna engizildi, dep habarlaidy dalanews.kz.
RIA Novosti málimetinshe, sportshy týraly málimetter saitta 22 qyrkúiek kúni keshke jariialanǵan.
Resýrs Júsipovti Reseige qoldaý bildirdi jáne Ýkrainanyń aýmaqtyq tutastyǵyna qarsy áreketterdi qoldady dep aiyptaidy. Bul – saittyń óz tujyrymy.
Basylymnyń jazýynsha, buǵan qazaqstandyq boksshynyń World Boxing prezidenti Gennadii Golovkinge qoldaý bildirýi sebep bolǵan. Buǵan deiin uiym reseilik sportshylardy halyqaralyq jarystarǵa óz týy men ánuranymen qatysýǵa jiberý týraly sheshim qabyldaǵan.
Júsipov óz pikirinde sport saiasattan bólek bolýy kerek ekenin aityp, onyń adamdardy biriktirýge, dostyq pen ózara qurmetti nasihattaýǵa qyzmet etýi qajet ekenin jetkizgen.
Aita keteiik, World Boxing atqarýshy keńesi biyl naýryzda Resei boks federatsiiasynyń uiymǵa kirý týraly ótinimin maquldady. Sáýirde Resei men Belarýs sportshylaryna beitarap mártebede jarysqa qatysýǵa ruqsat berilgen. Keiin Resei tarapy óz boksshylarynyń týy men ánuranymen qatysý múmkindigine ie bolǵanyn málimdedi.
"Mirotvorets" – Ýkrainaǵa qatysty túrli saiasi jáne áskeri máseleler boiynsha adamdardyń jeke derekterin jariialap kelgen daýly resýrs. Onyń bazasyna ár jyldary túrli elderdiń qoǵam qairatkerleri, jýrnalisteri, mádeniet ókilderi jáne sportshylary engizilgen.
