Ulttyq banktiń 2025 jylǵy 1 shildedegi deregine sáikes, qazaqstandyqtardyń kollektorlyq agenttikterdegi qaryzy 1 trln teńgege jetti. Jyl basynan beri bul soma 30,3%-ǵa, iaǵni 236,1 mlrd teńgege artqan, dep habarlaidy Dalanews.kz.
Qaryzdyń basym bóligi – 904,5 mlrd teńge nemese 89,1% – negizgi bereshek. Al qalǵan 110,5 mlrd teńge (10,9%) qaryz boiynsha eseptelgen syiaqyny quraidy.
Eń iri kólemdegi qaryz i-Finance agenttiginde – 243,5 mlrd teńge (24%). Ekinshi orynda HCB – 184,6 mlrd teńge (18,2%). Úshinshi orynǵa «TsAKA» shyqty – 59,8 mlrd teńge (5,9%). Osylaisha, úsh agenttiktiń úlesinde qazaqstandyqtardyń kollektorlarǵa berilgen qaryzynyń 48,1%-y bar.
Elde resmi tirkelgen 193 kollektorlyq agenttiktiń qalǵan 190-y jalpy bereshektiń 51,9%-yn óndirip júr. Bul árqaisysyna orta eseppen 2,8 mlrd teńgeden keledi. Bul soma tipti úzdik úshtiktegi eń az úleske ie «TsAKA» agenttiginen 21 ese tómen. Al 71 agenttik múlde qaryz óndirip jatqan joq.
i-Finance-tiń iesi – Baqdáýlet Alihanov. eGov derekterinde osy attas azamat 2022 jyldan beri Qazaqstan zań keńesshileri palatasynyń tiziminde tirkelgen. HCB Ashan Ermekbaevqa, al «TsAKA» – Almaz Ashimovqa tiesili.
